東京奧運|吳諾弘酒店隔離孖劍擊師兄玩直播 為身高160cm大平反公開真實高度
文:東方新地|圖:吳諾弘IG、張家朗IG、張小倫IG
東京奧運花劍代表吳諾弘首度開直播
東京奧運男子花劍隊日前離開東京,張家朗、大師兄張小倫及蔡俊彥直接到深圳準備全運會,而吳諾弘則回港養腳傷,四人分別在香港及深圳進行隔離,吳諾弘發起跟師兄們一起開直播,今次是他們首次開直播,吳諾弘拍住師兄們身高明顯比下去,為此吳諾弘在直播中為自己身高大平反,與師兄們的妙問妙答,互窒互爆料,足見兄弟情深厚﹗
![身在香港酒店隔離的吳諾弘,發起跟師兄們一起開直播﹗(圖片來源:吳諾弘IG)](https://imgs.orientalsunday.hk/wp-content/uploads/2021/08/d3a108e2-37e4-474a-a092-be044ad878c8_1085383750610b7bb236c1b.jpeg)
吳諾弘被指與台灣藝人撞樣
童星出身的吳諾弘被網民指似台灣藝人陳漢典,吳諾弘話唔知邊個,然後火速上網google,吳諾弘應大師兄張小倫要求O嘴對照一下,被師兄們指好似樣,連佢自己都話:「真係有啲似﹗」
![有網民留言指吳諾弘跟台灣藝人陳漢典撞樣,吳諾弘立即google對方張相來比拼,相當搞笑﹗(圖片來源:吳諾弘IG)](https://imgs.orientalsunday.hk/wp-content/uploads/2021/08/d447aa84-046d-4b9f-9e6e-e38f3edb95fc_369929816610b6399ab9f8-576x1024.jpeg)
吳諾弘重提童星谷眼淚大法,全靠…
在東京奧運團體賽中相當搶鏡的吳諾弘,由於是童星出身,被問到會否繼續拍劇,吳諾弘話唔會,因為只想專心劍擊上,大師兄叫吳諾弘即場表演喊功,張家朗即刻笑到掩嘴,吳諾弘話:「我依家係成熟嘅男人,係唔會輕易喊嘅﹗」大師兄追問佢以前拍劇點樣谷眼淚?吳諾弘話:「只要諗啲玩具冇晒就喊得出﹗」大家齊齊笑到反肚﹗
![童星出星的吳諾弘出戰東京奧運,郭可盈亦貼出當年合照力撐吳諾弘撐港隊﹗(圖片來源:郭可盈IG)](https://imgs.orientalsunday.hk/wp-content/uploads/2021/08/khy_official_229582268_202461741893507_5327464202540665829_n_1160273033610b7e875b58b-819x1024.jpg)
吳諾弘否認160cm親自公開身高
吳諾弘指在IG收到不少人詢問他的高度,張家朗笑指:「秘密嚟㗎喎﹗」吳諾弘笑指自己有190cm,張家朗忍住笑話:「嘩﹗好多水份喎﹗」最後吳諾弘親自公開身高之秘密:「我唔係外界指嘅160cm都唔係170cm,我係有175cm,同親師兄影相,佢哋成日要我企中間,搞到出現凹字,如果我企側邊咪冇咁覺囉﹗」張小倫即答:「佢成日同我哋一齊,大家以為佢矮啫﹗哈哈哈﹗」
![吳諾弘指與師兄們影相,往往被安排企中間,令合照出現凹字﹗(圖片來源:吳諾弘IG)](https://imgs.orientalsunday.hk/wp-content/uploads/2021/08/490df970-8360-4ad0-9350-32e34e42497b_1181362656610b7e0d3dab0-576x1024.jpeg)
吳諾弘公開認名草有主
直播時有網民問到奧運村多唔多靚女,吳諾弘被大師兄點名回答,吳諾弘口窒窒答:「公道啲講,好多人,靚唔靚見仁見智。」之後吳諾弘大叫:「哎呀﹗我女朋友叫我講多啲呀,死啦,最衰都係大師兄要我講﹗」場面搞笑﹗當網民問到大家的擇偶條件時,吳諾弘被大師兄問理想型女友係點,吳諾弘好識做:「我女朋友咪係我理想型囉﹗」
吳諾弘、張家朗歡迎市民集郵
吳諾弘透露現時要在香港酒店隔離七日,再在家居隔離七日才可出關,他指好想快點練劍,因為東京奧運比賽後有感自己有很多不足,被師兄們笑:「你依家返去冇人同你練喎﹗冇教練,去晒準備全運會﹗」有網民問在街上遇見大家能否集郵,吳諾弘笑答:「一定要㖭啦,真係冇問題㗎﹗」張家朗亦和應表示歡迎市民向他集郵。
![吳諾弘跟大師兄張小倫開住直播等張家朗加入,大師兄爆自己在酒店房的怪事,嚇得吳諾弘大叫:「我唔聽呀,我一個人喺酒店房﹗」(圖片來源:吳諾弘IG)](https://imgs.orientalsunday.hk/wp-content/uploads/2021/08/d9ce7fac-1f5e-4065-9ef7-621a9c5fa576_74352702610b6505eb200-576x1024.jpeg)