林夏薇

林夏薇30歲停工生B 生一個獎一億

2015年林夏薇秘嫁隱形富豪莫贊生(Jason),婚後老公錫到燶,進駐市值15億山頂獨立屋又獲打本過千萬投資食店,不過林夏薇冇翹埋雙手做少奶奶,繼續捱更抵夜為無綫拍劇。莫贊生大林夏薇15年,二人一直有造B計劃,不過都係得個講字,老婆唔急老公急。
有指去年底林夏薇收到老公的最後通牒,要盡快為莫家繼後香燈,盛傳生一個獎一億,林夏薇終於應承拍埋《十二傳說》就停工等孕到,剛踏入30歲的她身體機能甚弗,亦有睇中醫調理,有望一擊即中。林夏薇未生B已有車有樓,做埋人母肯定獎金獎品打孖嚟,莫家金叵羅正宗含住金鎖匙出世。

撰文:東方新地|圖片:新傳媒圖片庫、林夏薇IG

林夏薇 為生仔做足準備

林夏薇遇富愈富,有指婚後即穩袋兩億家用,仲有車有樓揸手,現與老公同住山頂獨立屋,閒時坐自家遊艇出海,生活寫意,不過莫贊生經常飛外地工作,一個人住咁大間屋,都係時候為獨立屋添個小主人。據知林夏薇老公婚後已心急想生仔,不過見老婆事業剛有起色,他亦願意讓步,不過年紀愈大生仔壓力都愈大,知情者透露:「Jason真係好鍾意小朋友,不過佢真係好錫薇薇,結婚時薇薇都係得28歲,佢話好想再拍多幾年戲先生仔,因為做咗媽媽乜都要以仔女行先,再加上呢兩年幾連開咁多間食店,佢都想生意上晒軌道先,Jason惟有等吓啦!不過男方家人不停畀壓力,薇薇就話仲後生啫,但Jason已經45歲,而薇薇見到身邊姊妹個個都生晒,亦終於開始動搖喇!舊年6月薇薇30歲生日,Jason喺遊艇同佢慶祝生日,當晚佢哋傾好咗未來一年要努力造人,Jason好興奮好期待,話必有獎賞,等薇薇拍埋手上最後一套劇就開工,佢哋嚟緊會去外遊,喺relax嘅環境同心情下,希望好快就有好消息啦!」

林夏薇
日前林夏薇拖埋老公莫贊生出席林子善的婚宴,與堂哥林峯齊跟一對新人合照。
林夏薇
林夏薇15年與隱形富豪莫贊生(Jason)閃婚,外界本來對男方一無所知,婚後即被起底。莫贊生擅長收購、融資,財技了得,曾是五間上市公司及十間私人公司的股東,包括華人飲食集團有限公司及華人策略有限公司的執行董事,加上在其他上市公司的股份及年薪,保守估計身家逾30億。

為了一擊即中,林夏薇近半年不停操弗自己,時刻保持最佳狀態,兩夫婦不時在獨立屋內的自家健身室做運動,知情者說:「之前薇薇一路拍劇搞到身體好差成日病,依家套劇終於煞科,佢就成日做運動又去睇中醫keep住調理,兩夫婦仲一齊去做身體檢查,大人健康啲,生出嚟嘅BB就更加健康啦!」

林夏薇
喜歡小朋友的林夏薇,之前見到徐榮個女包包愛不釋手,對於被麥玲玲師傅批有機生雙胞胎,林夏薇話 :「一仔一女梗係好啦!」
林夏薇
拍無綫劇日以繼夜辛苦到爆,林夏薇試過連續一星期每日只休息兩至三個鐘,體力透支令健康變差。
林夏薇
與蕭正楠拍的新劇《十二傳說》日前終於煞科,林夏薇即準備停工生B。

被批生龍鳳胎

早前林夏薇為新劇《逆緣》做宣傳,活動上麥玲玲師傅為眾人測字指點迷津,林夏薇以「明」字問添丁,麥玲玲指她今年報喜機會高,更可能懷上龍鳳胎,她即場開心回應:「希望承師傅貴言,龍鳳胎梗係好。我哋好鍾意小朋友嘅,好想生3個,不過都要睇緣份,我同老公各有各忙,見都冇時間,好似同屋住,所以我拍完《十二傳說》後會休息一段時間,可以多啲陪屋企人。」林夏薇所講的停工是指不再接劇,即使陀B成功,亦會照樣接其他工作及打理食店生意,不過一切都以生仔行先。

林夏薇
早前林夏薇與老公莫贊生由司機接載離開位於山頂的獨立屋。
林夏薇
到中環後林夏薇夫婦二人先後落車

林夏薇

老公陪出入

結婚兩年半,林夏薇與莫贊生仍像熱戀,雖然因為工作不是經常見面,但二人都珍惜相處的時間,不時互氹為日常生活增添情趣。早前本刊記者直擊夫婦二人由司機接送到中環,林夏薇去髮型屋恤髮,莫贊生就到附近閒逛等老婆,二人甚有默契。嫁入豪門非易事,要同富豪老公講心又講金就更加難,不過林夏薇兩樣都做到,現在停工生B,老公仲畀獎金,一億都當係碎銀,絕對是人生大贏家。

林夏薇
林夏薇前往髮型屋扮靚整頭,個多小時後離開,見到本刊記者,她友善地打招呼,並停下來接受訪問。
林夏薇
闊太生活出入有司機接送,林夏薇一個急call,司機極速到達。
林夏薇
林夏薇上車後再去接埋老公一齊返家。

延伸閱讀:

TVB女藝人學歷大檢閱 48個你知幾多個?