林子善

林子善35歲兩層樓揸手 秘訣一字記之曰:慳!

現今世代好多年青人都狂呻上車買樓係難事,但屋邨出身嘅林子善不但自己成功上車,仲買咗間村屋畀父母住,又借埋首期幫阿哥上車買樓,35歲已經係兩層樓嘅業主,唔使靠父幹,全因佢夠勤力兼慳家,不但經營冰室事事親力親為,平日連旅行都好少去,亦好少出街食飯,實行慳得一蚊得一蚊!

撰文:東方新地|圖片:新傳媒圖片庫

林子善 上車買樓全靠慳

35歲林子善日前筵開63圍同老婆Kary補擺喜酒,今次婚禮豪花咗七位數字,林子善話儲錢都儲足兩年:「除咗無綫返工外,我出面都有『跑山』搵錢,慳啲使囉,結婚我唔會理賺定蝕!」

為慳錢 日日在家煮飯

其實除咗儲老婆本,林子善為買樓上車,亦係慳得就慳,佢話為咗努力儲錢,平日出入搭地鐵,好少去旅行,亦好少出街食飯:「我一個禮拜七日都喺屋企自己煮晚飯食,簡簡單單買棵菜就夠食幾日!」

林子善
林子善為今次擺酒娶老婆豪使七位數字,儲錢都儲足兩年。

林子善

林子善:出糧儲起七成做首期

林子善又寄語年輕人,如果想盡早上車,出糧時就要儲起七成做首期,並且要喺偏遠嘅新界地區入市:「我自己買嘅第一個單位,就係用零首期方式買入屯門嘅豫豐花園,喺未供完之前就轉手賺咗筆,之後就買咗依家間村屋。」佢又指自己有一個屯門情意結,所以搬來搬去都喺屯門。

林子善
林子善寄語年輕人若想上車,最緊要係個「慳」字。

林子善

親力親為 經營冰室

林子善在屯門屋邨長大,16歲跟周星馳入行,在《喜劇之王》飾演「洪爺」一角,少年得志,但後來周星馳同拍檔拆夥,林子善因此近三年完全冇工開、零收入,之後做過時裝店sales、夜場DJ,到08年獲黃子華引薦入無綫拍《奸人堅》,事業先開始好轉。2012年,林子善與拍檔夾份投資首間龍鳳冰室,事事都落手落腳親力親為,至今已開到四間分店。

林子善
林子善經營龍鳳冰室事事都親力親為,入貨落單一腳踢,仲勤力過班伙計。

林子善

林子善話因為試過有兩年冇工開,當時生活好慘也曾經捱過,所以如今事業有起色,對未來嘅事佢會諗得更周詳:「依家要照顧老婆,要諗得更長遠,諗定之後兩年目標係咩,我要努力搵錢買樓,同太太組織家庭,因為之前買樓畀父母,又幫阿哥上車買樓,依家終於可以為自己打算吓!」

林子善

買樓贈父母

原來林子善首次置業,係以零首期方式買入屯門豫豐花園一個200多萬元單位,佢將豫豐花園放租兩年,之後自住咗三年後放售,將賺到嘅錢買入屯門藍地一間三層高嘅村屋送畀父母居住,佢話當時樓價215萬元,畀咗六成首期,每月供款只需3,000多元,而佢自己就為咗睇住冰室嘅生意,曾經喺大坑租住單位。

林子善
林子善話幫阿哥Kevin畀首期,係因為姪仔出世,所以佢想逼阿哥儲錢供樓,唔想佢再亂花錢。

義氣仔女幫阿哥上車

愛錫家人的子善,之後又借老婆本幫阿哥上車買樓,佢話:「兄弟一場,既然哥哥開到聲一定會幫,姪仔出世,哥哥同阿嫂又唔太識理財,長此落去會好危險,我需要為佢諗一諗,既然佢想上車,我就幫佢,連自己兄弟都唔幫就真係冇義氣!」真係義字行頭嘅好細佬!

林子善
《果欄中的江湖大嫂》中蓆仔對棄婦惡人菊(甄詠珊飾)不離不棄,同現實中嘅林子善一樣咁情深義重。

有子女或再換樓

除咗供緊買畀父母嘅村屋,林子善努力儲錢買愛巢,終於喺2015年買入咗東涌東環一個近300平方呎嘅一房單位,樓價逾400萬元,林子善畀咗27萬元印花稅,另由於壓力測試及職業問題,需要付出六成首期,佢大呻:「爲咗供兩層樓我出盡九牛二虎之力,依家係窮人!」唔緊要,依家有老婆同你一齊捱,值得嘅!子善又話婚後希望三年內造人成功,他日有小朋友或者到時換個更大嘅單位!

林子善