林子善補擺喜酒 賓客星光熠熠勁過台慶

林子善昨日與拍拖5年的圈外太太董佩欣補辦婚宴,本來兩人只打算筵席50圍,但由於子善人緣實在太好,圈中朋友多不勝數,所以最後要加到63圍!呢晚婚宴可謂星光熠熠,TVB藝人幾乎傾巢而出,熱鬧過台慶!賓客中有靚到爆搶晒鏡的苟芸慧、岑麗香等,又有好耐無見的羅仲謙楊怡夫婦、陶大宇等人,果然係架勢堂呀!

撰文:東方新地|圖片:東方新地

林子善補擺喜酒

林子善與去年已註冊的太太董佩欣昨日舉行婚宴,晚上兩人會見傳媒,子善表示原本只擺50圍,但因為太多親朋戚友俾面出席,所以加到63圍,預計婚禮支出約7位數!子善同太太同好識做,嘴對嘴錫足一分鐘俾大家影相!

新郎子善好眼淺

提到會與太太共度餘生,子善都忍唔住講到眼濕濕,佢表示唔想空口講白話,行動最實際,首先會照顧好自己身體、做好自己工作,咁先可以好好照顧太太,一齊走埋下半生。子善提到較早時未講愛的宣言已經喊晒,斟茶俾外父外母又好感動,自己好眼淺!

兄弟團迷倒姊妹們?

提到昨日早上接新娘過程,子善招積咁話易過借火!型男兄弟團出馬,班姊妹見到袁偉豪已經開咗三分二門,之後見到馬國明同鄭嘉穎就更加失晒魂,幾乎係自動開門!子善又稱玩新郎時食咗鹹竹蜂加wasabi,咳到佢死!

賓客星光熠熠

呢晚見到早排先同男友陸漢洋訂婚的苟芸慧,苟姑娘著上深藍色長裙,再被件西裝外套,容光煥發,笑容勁燦爛!苟姑娘表示近日拍廣告辛苦,所以瘦咗唔少,而廣告中仲會著泳衣!都係嗰句啦,苟姑娘無論肥定瘦都一樣咁索…

雖然話苟姑娘索到爆,不過香香公主岑麗香同樣搶鏡!直間連身裙加條belt,腳踏高踭鞋,簡單又好睇,不過靚女著咩都靚㗎啦!

子善喺圈中朋友多,擺酒個個都俾面,最驚喜都算係楊怡同老公羅仲謙手拖手出場!楊怡聽到大家叫佢「羅太」,更加係笑到見牙唔見眼~

讀者留言