林海峰

林海峰 彭羚 送女出國阻入行 悠閒拍拖

基因強、後台硬、成行都係Auntie、Uncle,眼見近年林海峰、邱淑貞、陳奕迅愛女初長成個個亭亭玉立,大公司紛紛吼實想簽入門,不過星爸星媽個個態度保守,尤其林海峰!去年17歲林泳被兩家公司同時睇中力爭,林海峰極力反對愛女入行又認為學業為先,據知今年索性送林泳出國升學。大女離家一身輕,兩公婆樂得清靜,即時有閒情逸致拍吓拖!
撰文:東方新地|圖片:新傳媒圖片庫、林海峰FB

林海峰 年初送走囡囡

結婚廿年、婚後即放棄如日中天事業,為林海峰生下兩個女林泳、林清專心湊女,彭羚十多年來悉心栽培養育、去到邊都帶埋兩個女喺身邊,早前難得見同老公林海峰兩個拍拖出巡,便服素顏去到大坑法式糕點名店買甜點外賣回家慢慢歎。今年二月剛滿49歲,彭羚卻皮光肉滑一點也不像將近半百,就算不施脂粉一樣信心十足心情靚靚,買完大袋包點面帶笑容站在店外四處張望,正好等到林海峰泊好車行到迎接。一見老婆,Jan立即伸手接過手中紙袋,錫老婆錫到出面!

林海峰
結婚廿年恩愛如昔,日前林海峰陪彭羚到大坑買人氣法式甜點,一見老婆即體貼伸手搶拎紙袋。
林海峰
一見老婆,林海峰習慣成自然伸手幫老婆拎袋,發現鏡頭後,亦都唔介意兩公婆拍拖齊齊上鏡,更提彭羚望鏡笑。
林海峰
有得拍拖,係因為林海峰終於送咗大女林泳出國升學,唔使再應酬各大唱片、電影公司游說簽女入行。
彭羚 林海峰
49歲彭羚不施脂粉、一身便服出巡,不過皮光肉滑心情又靚靚,埋單畀錢離開時笑容滿面神色輕鬆。
彭羚 林海峰
該大坑名店有法籍糕點師駐店主理,最出名係法式雪糕同朱古力酥及草莓撻,彭羚當日有食慾又有興致,淨係包同撻都掃咗成二百元。

愈大愈靚

終於有得二人世界,係因為大女離家升學、二女林清亦都已經十三歲唔黐身。18歲林泳在名校女拔讀完初中,林海峰與老婆意見一致,希望女兒少點壓力多向發展,所以兩年前為女兒轉校到漢基國際學校繼續學業。眨吓眼高中畢業,本來都唔捨得送女出國,去年卻因為有傳聞指林泳身形高䠷、五官清秀,是游泳溜冰健將又遺傳媽媽基因好唱得,所以被多間大型娛樂公司游說接洽入行。

林海峰
終於捱到女大女世界,彭羚明顯甚為享受同老公林海峰二人世界,由步出餅店到向記者道別到撻車離開,一直都忍不住甜笑。

林海峰
離開樂壇19年,彭羚除了畀面Wyman唱過一次作品展咁大把,以及為母校開過一次金口,據悉堅持不復出亦是因為聽晒老公林海峰話。
林泳 林海峰
二千年情人節出世,林泳10歲時跟住媽媽拖妹妹林清去女拔開學,大方又得體。
林泳 林海峰
早年陪媽媽入場看演唱會,林泳眉清目秀,不過就因為箍緊牙見到鏡頭好怕醜。

廿年前堅持讓彭羚退出樂壇專心湊女、十八年後林海峰同樣反對愛女入行做藝人,所以一邊廂婉拒游說,另一邊廂就鋪路送女出國升學。其實學業固然重要,不過林氏姊弟三個都係娛樂圈中人、林珊珊兩個女都入埋行,送出國相信只係權宜之計。

林泳 林海峰
進入青春期後,林泳身高已經拍得住媽媽,眼大又腳長已經開始有仙氣。
林泳 林海峰
去年盛傳兩家娛樂公司紛紛出手爭簽林泳入行,網上流出林泳學校泳衣相亦可見林家長女初長成,果然氣質、外貌都有台型又有星味。

省鏡星二代

其實除咗林泳,仲有邱淑貞大女沈月、任達華愛女任晴佳同Eason獨女康堤亦愈大愈靚,不過就唔係個個好似林海峰咁極端,反對入行反到要送個女出國。

沈月 林海峰
15歲沈月同媽媽一個餅印,分別在於更青春更有仙氣,父母對其入行不算十分抗拒,去年更為慈善首拍聯合國兒童基金會廣告。
康堤 林海峰
13歲康堤就遺傳父母氣質,少女味重得嚟有型又有性格,由細到大見慣鏡頭,次次跟住媽媽出鏡都自然又淡定。
任晴佳 林海峰
任達華、琦琦愛女任晴佳,五官標緻得嚟,13歲人仔已經超長腿、170cm高就快拍得住超模媽媽,最近亦都第一次玩票性質參與拍攝時尚照,表現超班。