梁靖琪

梁靖琪35歲失婚趕生B 拖大隻新歡斷正

七魔女成員個個嫁晒做埋媽媽,除咗佘詩曼依然單身,其實仲有失婚後未有著落的梁靖琪。阿佘話搵到合適隨時閃婚,而一向鍾意小朋友、心急做媽媽的Toby更揚言四十歲前未搵到Mr.Right就飛去美國借種生仔!原來靜雞雞,Toby先行超前阿佘!日前被本刊斷正Toby拖大隻紋身新仔遊銅鑼灣,泊低車手拖手甜到漏行去搭𨋢,不過上到商場就自動分開前後腳入戲院。經歷過失婚,為免戀情曝光影響再做人妻之進度,不惜擘大眼講大話,死口唔認有拖拍。

撰文:東方新地|圖片:新傳媒圖片庫

梁靖琪 唔認有拖拍

14年同有米老公黃敏豪結婚半年即告閃離,四年來Toby專心工作、醉心健身,雖然身邊不時有大隻異性團團轉,不過次次唔係健身教練就係老友,全屬美麗誤會。上次閃婚同吳卓羲玩得埋再閃離,搞到滿城風雨,經此一役Toby次次對於感情事都絕口不提,一改以往作風,話要低調處理。果然講到又做到,近日大隻新歡出現,即使被影到手拖手,繼續唔肯認。

梁靖琪
為保戀情,入戲院前Toby突然離奇變裝,換衫兼將頭髮束起。發現記者,Toby大方接受訪問,不過被問到有冇新戀情,就大耍太極,唔認有拖拍。
梁靖琪
七魔女湯盈盈、鍾麗淇丶周家蔚丶文頌嫻、姚樂怡全部已經結婚生,只剩佘詩曼未嫁,而離婚四年的Toby原來亦已有新戀情。

借種生B

離過婚近日蜜運的Toby一直恨做媽媽。據知情者透露:「Toby一直想再婚生B,每次見到好姊妹啲細路同姨甥仔,都好開心爭住湊佢哋,佢成日都話,想快啲生BB,仲話如果40歲嫁唔出,會去美國借種生B。」

梁靖琪
近年經常傳出同健身教練兼公司partner拍拖的Toby,原來真命天子另有其人,日前就被本刊斷正同大隻新仔去銅鑼灣時代廣場拍拖,在停車場更全程十指緊扣行去搭𨋢。
梁靖琪
好明顯兩人係熱戀期,拖住行傾偈亦貼到埋一埋,相當甜蜜。

拖實紋身男友

滯留內地拍攝爸爸梁家樹有份監製的網劇《蝕日風暴》足足四個月,近日終於煞科回港,Toby嗱嗱聲去銅鑼灣見新歡。近年愛上健身更籌備緊健身室生意,Toby新歡亦都十足健身教練咁款,大隻靚仔仲有一身威猛紋身。當日她將座駕交畀男友駕駛,二人在時代廣場停車場泊好車後,十指緊扣從車場行到升降機大堂。不過唔甜蜜得幾耐,一上地面即彈開十呎遠,由Toby買飛準備睇七點半。

梁靖琪
不過,拖手只限在停車場,二人上到地面,已經自動分開保持距離。戴住cap帽的Toby,先搭另一部𨋢上地面買定戲飛睇7點半,大隻男友就在地下坐埋一邊食煙等Toby召喚!
梁靖琪
為保戀情,兩人在人多地方一直保持距離,到差不多夠鐘睇戲,才前後腳入場。

梁靖琪

鬼崇彈開

遇見記者問感情狀況,Toby見男友不在身邊以為戀情未曝光繼續撐:「冇呀,冇拖拍呀!啱啱喺內地拍完劇返香港,諗住睇場戲,最近都係忙緊幕後嘢,會搞GYM Room,又會搞吓健康餐咁,多謝你哋關心先!感情嘢我一向少講,順其自然啦,總之依家係開心嘅!」

梁靖琪
早在一月本刊亦撞破Toby同新歡到時代廣場行街,當時一見記者,兩人立即分頭走,Toby一個人去睇化妝品引開記者。但原來男友已在停車場等她,再坐Toby座駕離開。
梁靖琪
以為撇甩記者,兩人在車內亦傾得非常開心。

延伸閱讀:

鋼管舞女神貝依霖 有舖露股癮

關鍵詞
梁靖琪