森美

【森美旅行團2】重溫森美沙灘曬股放雀

《森美旅行團2》熱播中,早前一集森美丁子朗去澡堂,齊齊光脫脫入浴,雖然話小鮮肉丁子朗的健碩肌肉好吸睛,不過就快45歲的森美大哥其實都毫不失禮!不過森美大哥並唔係一直以來都係大隻仔,早年佢曾被本刊影到去沙灘曬股放雀,事後更被小儀瘋狂恥笑……

撰文:東方新地|圖片:東方新地、《森美旅行團2》截圖

《森美旅行團2》已經出發

一連十集的《森美旅行團2》已經播緊,今次繼續由森美大哥帶隊,但就冇咗上輯的黃心穎同高海寧,舊團友麥美恩(Mayanne)有得留低,換上吳若希、丁子朗加入,齊齊帶大家去日本京都、和歌山及岡山食玩買~

呢個新主持組合大家點睇呢?

森美丁子朗澡堂騷肌

早前《森美旅行團2》第二集,森美帶住丁子朗介紹京都電氣風呂「衣笠溫泉電氣風呂」,入到澡堂,就係二人騷肌嘅大好時機!丁子朗露出健碩肌肉超吸睛,相反森美就搞笑地扮錫身,好似女仔咁將毛巾包到上心口,連兩點都唔露,大方畀對方搶鏡!

森美

森美望住丁子朗身體下方,嚇到嘴都O晒,見到啲咩呀?

電到硬晒軑

由於全裸進浴場是禮儀,森美同丁子朗當然入鄉隨俗,並將重要部分「打格仔」處理~最特別係呢個電氣風呂係帶有電流,搞到森美同丁子朗都全身硬晒,肌肉繃緊,兩個人啲表情都勁浮誇,佢哋愈慘,觀眾笑得愈開懷!

森美Body唔失禮

21歲小鮮肉丁子朗一身健碩肌肉固然係搶眼,但其實就45歲的森美大哥一啲都唔失禮,胸肌脹卜卜,雙臂結實,完全冇肚腩,唔係好多中年叔叔可以keep到咁㗎!

森美
兩個都咁「肌」!

重溫森美沙灘曬股放雀

不過森美大哥唔係一直以來都係大隻仔,早年本刊影刊森美與老婆Veronica去到深水灣享受陽光與海灘。喺三十幾度高溫、烈日當空下,一身運動裝束的森美好快除去背心,只剩下一條灰色運動短褲。之後… 到戲肉啦!

森美
森美大哥同老婆Veronica都係一身運動裝束,襯到絕。

巨鵰若隱若現

除去背心的森美睇得出身形圓潤、腰間多了贅肉,佢仲突然非常麻甩咁將短褲向內摺,短褲就愈摺愈少布,搞到巨鵰若隱若現,實行大解放!

「股」壇新秀

森美將條短褲摺吓摺吓,搞到露出一截股肉,講電話的同時左手仲喺巨鵰前捽吓捽吓,實在惹人遐想!

森美
雖然老婆Veronica在場,不過森美眼睛想旅行,對不遠處一位外藉美女目不轉睛!
森美
自拍一張先!

小儀瘋狂恥笑

之後森美於電台節目《早霸王》重提被本刊拍到「放雀」一事,被其拍檔小儀瘋狂恥笑,稱「將條運動褲攝到咁真係好阿叔!」仲將森美條短褲形容為「BB尿布」!小儀又笑指平時啲明星藝人通常會話傳媒報道失實,不過今次就非常真實,俾大家睇到真實森美麻甩的一面!小儀尤其針對森美露股照,封對方為「股」壇新秀!

不久後森美於網上反擊,大晒自己的弗爆肌肉照,不過就唔知啲相係幾時影啦!