樓上裝修狂鑽牆 心痛初生B女瞓唔好 官恩娜:想跪求佢哋唔好鑽!

相信大家都明白鄰居裝修,日日鑽牆係一件幾咁煩躁嘅事。已為一子之母的歌手官恩娜 (Ella)上週誕下囡囡Aurélie(BéBé A),出院返屋企後,Ella開始坐月同湊B,之不過樓上咁啱喺佢臨生前幾日開始大裝修,日日不斷鑽牆,製造大量噪音,Ella話佢唔係想投訴,因為每個人嘅屋企都有機會裝修,只係作為媽媽嘅佢,極度心痛B女受驚同埋瞓得唔好,直言想上樓上跪求對方停工,真係陰功豬!

撰文:東方新地

圖片:官恩娜 Instagram

官恩娜 湊夠「好」字

自從Ella 2015年跟中法混血醫生Juan-Domingo Maurellet結婚,直至誕下囝囝Gabriel(BéBé G),為照顧兒子一直停工,原本去年5月復工,但發現再懷第2胎,又要再次暫停工作,專心安胎。官恩娜上週於社交平台宣布囡囡出世的消息,囡囡名字為Aurélie(BéBé A),Ella喺社交網站代囡囡留言話:「大家好!我叫Aurélie,好高興認識你哋。我1月16日出世,係BéBé G細妹。」BéBé A瞓住嘅床單同冷帽都係粉紅色,好可愛呀!

心痛囡囡瞓唔好

已出院休養的Ella,本來應該開開心心坐月同湊B女,但佢昨晚喺網上大吐苦水。原來樓上在Ella臨生前幾日開始裝修,直到近日工程依舊未完成。佢又補充話,明白人人都有權利裝修,只係惟擔心鑽牆聲影響囡囡休息,仲高呼「好想上去跪佢哋唔好再鑽」,加埋一堆痛哭表情符號,睇到都戥佢同BéBé A心痛。

早喺Ella懷胎9個月時,就影咗一輯懷孕寫真,一家四口好溫馨呀!

Ella仲post咗囡囡嘅超聲波相添!

隱居專心照顧囝囝

囝囝BéBé G出世後,Ella並以湊仔為樂,專心照顧家庭,絕對係一個好媽媽好老婆。