死侍2

《死侍2》入場前必知8件事|放心冇劇透

繼《復仇者聯盟3:無限之戰》後,《死侍2》(Deadpool 2) 亦已經喺香港上畫啦!呢位Marvel最瘋狂又爆笑的角色再次回歸,《新地網》現為大家送上睇戲前必知8件事,讓大家了解多啲睇得投入啲,亦唔會錯過任何精彩場面!(利申:冇劇透,放心睇)

撰文:東方新地|圖片:Facebook、電影劇照、網上圖片

1|死侍擁有不死之身?

電影中原名Wade Wilson的死侍,為治療癌症在「Weapon X」的實驗室同其他對象一齊接受試驗,人生從此改變。死侍本為特種部隊軍人,精通多種的武器及武術,接受試驗後更獲得自愈再生能力,受到任何傷害、甚至肢離破碎都一樣殺佢唔死!

死侍2 死侍2

死侍同Thanos爭女?

同電影一樣,漫畫中講述死侍被關在「Weapon X」的實驗室,被施以各式各樣的實驗,多次在死亡邊緣徘徊。而每次在生死關頭時,都會有一個身穿斗篷的女人在身旁安撫佢,後來發現呢個女人就係死亡女神(Death)!而好色成性的死侍竟然愛上了死亡女神,更希望別人殺死佢,讓佢可以同死亡女神永遠在一起。

死侍2

不過好可惜,死侍有一個非常屈機的情敵,同樣愛上死亡女神的仲有Thanos!漫畫中,呢位《復仇者聯盟3》的終極反派詛咒死侍令佢成為不死身,咁佢就永遠都唔能夠見到死亡女神(好狠毒!) 本來死侍只係有超強的自癒能力,不過從此佢就擁有了真真正正的不死之身。

死侍2

2|打破「第四面牆」

喺Marvel世界中,死侍係唯一一個知道自己係活在漫畫中的人物,所以經常打破「第四面牆」(「第四面牆」是一個戲劇術語,意即戲劇與觀眾之間的隔膜),經常會忽然同讀者說話,與一般傳統漫畫大不同。所以在電影中,賴恩雷諾士(Ryan Reynolds)都會望向鏡頭對觀眾說話,甚至有揮手示意播放背景音樂的有趣場面。

3|瘋狂抽水兼惡搞

如果有睇過《死侍》第一集的話,都知呢位非一般超級英雄非常口賤,粗口爛舌不在話下,更會瘋狂抽水,寸盡其他超級英雄(不論Marvel或DC)、流行文化、明星紅人等等,電影中可能一首歌、一個動作或一個人名都係精心安排。不過對電影或流行文化唔太熟悉的朋友,睇時可能會「黑人問號」,唔明其他人點解笑啦。

4|《死侍2》新角色介紹

Cable 機堡

今集奸角Cable(機堡)由老牌演員佐斯布連飾演,來自未來的半人半機械士兵,手握破壞力強大的武器,而且擁有心靈感應、預知未來、念力及穿越時空的能力,同死侍將有一番惡鬥!漫畫中Cable為「鐳射眼」的兒子,所以左眼能夠發射出鐳射光線!

佐斯布連同時在《復仇者聯盟3:無限之戰》飾演大反派Thanos,連續喺兩套大片擔任重要角色,呢期最威係你!

Domino多米諾

死侍組成的「X-Force」成員之一,身材火辣的Domino本名Neena Thurman,其變種人能力為「好運」,在不同情況下都處於運氣極佳的狀態,令佢輕易避過重重危機,毫髮無損。另外除了超能力,Domino亦擅長武術和精通各種武器。

Firefist 火拳

今集的重要角色Firefist(火拳),呢個肥仔能夠用雙手製造及控制火焰,有啲似《變種特攻》電影系列的「火狂」。另外因為某些原因,佢在電影中成為Cable的刺殺目標,同時成為死侍的保護對象。

變種特攻》電影系列的「火狂」

Surge/Yukio 雪緒

日本女星忽那汐里飾演的Surge/Yukio,一頭粉紅色頭髮,聲線可愛嬌嗲,在片中為另一角色「彈頭」的女朋友。Yukio能夠操縱雷電去使出電鞭,有型!

題外話,《狼人:武士激戰》中,福島莉拉飾演的女變種人同樣係叫Yukio雪緒,唔知兩者有冇關係呢?

《狼人:武士激戰》劇照
《狼人:武士激戰》劇照

Peter

Peter哥,中年鬍鬚肥佬一個,無任何超能力,純粹見到廣告所以貪得意應徵加入X-Force,同時擁有第一及第二型糖尿病。最搞笑係死侍得悉佢無超能力後,竟然反高潮地照俾佢加入:「You’re in!」連場笑彈隨之而來!

5|新舊版死侍

男主角賴恩雷諾士(Ryan Reynolds)其實多年前已經演過死侍,《變種特攻:狼人外傳》中,賴恩飾演的雙刀高手同樣叫Wade Wilson,同樣口水多多。本來都仲有靚仔樣,不過之後被改造成變種人武器,爛眼又封口,造型極之樣衰,同現今的死侍相距甚遠。

6|荷李活巨星客串一秒

大家睇《死侍2》除了要落足心機留心彩蛋及抽水位,仲要留心一位客串的荷李活巨星!據知呢位男星本來喺演Cable的候選名單中,但最終未能演出,所以改為客串其中一角。真係得一秒左右㗎咋!

7|片尾彩蛋必睇

《死侍2》片尾彩蛋大家一定一定要睇!彩蛋共有三段,爆笑、抵死、自嘲兼有之,絕對係神來之筆。而且唔使好似其他Marvel電影咁等一大餐先睇到,點可以錯過?

8|關於希特拉的彩蛋被刪去?

《死侍2》確係有大量彩蛋位,玩到勁盡,不過原來有一個情節已經被電影公司刪去,放喺死侍電影都太Over!據外媒報道,刪去的一幕原來係關於死侍回到過去,殺死仍是BB的希特拉,片段中死侍站在標籤了「希特拉」的嬰兒床旁,之後將手放到BB的頸上… 殺害嬰兒的情節,或者真係太過火了。

關鍵詞
死侍2