母親節買禮送長輩 靚靚袁詠儀嘆做嚴母代價大 係因為⋯⋯
明日就係母親節,身為人母又係女兒嘅袁詠儀(靚靚)喺呢啲大時大節都會盡表孝心,佢話每年母親節都會買禮物同送花畀媽咪、奶奶同阿仔魔童嘅契媽,以答謝母恩!
撰文:東方新地|圖片:新傳媒圖片庫、袁詠儀IG
母親節送禮
明日就係母親節,早前就見到靚靚去咗銅鑼灣一間買電話嘅舖頭,佢喺度睇咗陣,唔使五分鐘就扑搥掃咗三部Iphone X,相信佢係熟客仔,店員仲做埋人肉速遞幫手拎貨,跟住靚靚齊齊去保母車,等靚靚坐穩就將貨交畀佢!睇嚟似係靚靚買嚟送畀長輩嘅母親節禮物!


做嚴母代價大
雖則靚靚重視呢啲禮節,會氹吓長輩開心,之但係原來自己就從來冇收過阿仔魔童嘅母親節禮物,靚靚為咗教好個仔,喺屋企一直擔任嚴母角色,反而老公張智霖 (Chilam) 就係阿仔嘅yes man,所以由細到大魔童都係比較黐爹哋多啲!


靚靚嘆:屋企只有父親節
靚靚無奈話:「做嚴母真係好慘,屋企只有父親節,冇母親節,待遇好懸殊,囝囝起身只係會搵爹哋,就算我喺正門口引佢注意,佢都只會叫『爹哋』,佢心情好嘅時候都會叫吓我嘅!唔緊要,有朝一日佢就會明白我嘅苦心。」母愛就係咁偉大,好似靚靚咁從來係無條件咁付出!

陳小春靚靚Chilam 化身賭神
展開最強親子旅行團
仲有早前復活節長假,靚靚袁詠儀同Chilam帶住魔童、陳小春應采兒同囝囝Jasper、蔡一智一家以及關心妍一家三口,一行十幾人浩浩蕩蕩去泰國布吉旅行,大家一齊入住一間超豪華resort。此行同時為了慶祝蔡一智太太雪芳嘅生日,大人細路仲要有dresscode,齊齊換上花碌碌衫開party,真係夠晒熱鬧!


呢班明星家長陪仔女游水、飲飲食食就當然走唔甩,亦自行安排大人玩動,就係鋤啤,講到玩啤牌大家都玩得好認真,連對住對手老婆靚靚,一樣唔會鬆手,靚靚亦眼神凌厲啤實,不過之後靚靚搞笑話大家係「賭城瘋人」。
