湯怡

湯怡街訪著返當年校服 學生妹造型超清純

最近英皇娛樂藝人的陳家樂走入電視圈拍劇,劇集《逆緣》中嘅表現更令觀眾們驚喜,指一直走漏眼咗呢個演員。其實,走漏眼嘅又點至一個人,屬同公司的湯怡,早在2006年參加《美女廚房》中美少女廚神選舉,當時就被冠「少女黎姿」稱號。12年咁就過去,今年10月就30歲嘅湯怡最近著番套中學校服出嚟做街訪,又靚又清純,零違和感!

撰文:東方新地|圖片:instagram

湯怡學生造型超清純

就快30歲的湯怡最近以學生妹造型做街訪,內容係咩未必重要,皆因大家都俾佢零違和感嘅學生妹校服look吸引住,睇極都唔似快將3字頭!街訪中湯怡仲係著番當年自己套中學校服,好啱身唔洗改之餘,仲好有鄰家女孩感覺,受訪者都忍唔住望多幾眼!

有片睇!不過大家應該都係望實湯怡而已…

湯怡街訪 Vol.2 – 《那些年的求戀期》

中學時代你有冇暗戀女同學?男同學點樣追你?聽到佢地嘅答案覺得好青春都令我好懷念中學時候嘅日子…不如你哋都留言講吓你嘅中學時代暗戀故事呀!#湯怡街訪#某日某月

Posted by 湯怡 Kathy on Wednesday, 18 April 2018

湯怡啱做學生妹?

其實,今次街訪並唔係湯怡事隔多年後再一次穿上校服,早前佢喺快將上映嘅電影《某日某月》中首次擔任第一女主角,做個學生妹,仲同靚仔原島大地有唔少對手戲!

湯怡已經名花有主

事實上,湯怡入行以嚟一直走鄰家女孩路線,係眾人心中嘅女神,所以擁有不少粉絲。可惜女神一早就已經名花有主,男友正是歌手洪卓立。二人拍拖已經足足11年,不時分享拍拖點滴,仲有個專屬Hashtag 「#大洪小怡」,真係隨時都被閃盲對眼。

湯怡曾經黑過嚿炭

不過女神湯怡亦曾經有過黑歷史,就係每個人都有嘅學生相!湯怡早前將自己學生相擺上網,並不禁留言話自己中學時候黑過嚿炭!咁又唔奇嘅,每個人都係愈大愈靚嘅~

除咗清純學生look難唔到湯怡之外,佢有時都會有打扮成熟嘅一面,簡直無論係咩造型或打扮都完全carry得起!大家喜歡湯怡邊一類造型多啲呢?