LEEKA1

演《城寨》惡霸 李嘉獲網民激讚

新劇《城寨英雄》收視高開平均30點,除了睇主角陳展鵬及胡定欣之外,演城寨惡霸馮夏滿嘅李嘉,成功將猥瑣、下流、卑鄙、賤格演繹得淋漓盡致,尤其施暴鑫鑫(林穎彤)嗰幕,真係睇到人咬牙切齒,演技備受網民激讚!

延伸閱讀:

孝感動天!《城寨英雄》林穎彤血手指救父

《城寨英雄》變態夏滿施暴前隊生雞蛋

大色狼活靈活現

就係日前呢幕將鑫鑫困於籠中,李嘉準備施暴前生吞雞蛋,又話要幫對方開苞、喊得愈大聲我愈興奮,睇見佢極度變態及猥瑣嘅樣,觀眾都緊張到手心冒汗!

原來好打得

而現實中,34歲李嘉生活十分健康,絕非像劇中惡霸一樣,周圍撩是鬥非!另外,劇中好多武打場面,李嘉都係親身上陣,因為佢6歲開始習武,先後接觸不同中外武術!10歲時更被挑選代表香港武術界以武歡迎香港最後一任港督彭定康上任到港,認真巴閉!到1999年,以真功夫成功考入TVB第四期動作特技演員訓練班,開始擔任龍虎武師,兩年後轉投第十八期藝員訓練班,畢業後先於TVB8頻道擔任過主持,後來轉至劇集演出工作。近年於劇集《巾幗梟雄之義海豪情》演黑木少佐、《飛虎》演飛虎隊警員郭耀祖及《護花危情》演黑幫惡霸熊勇,而漸漸為人認識!

向李小龍學習

入行十七年,一直演流氓、大奸角等六、七線角色,今次終於憑夏滿奸到出汁表現,令人印象深劑,李嘉笑言:「我由畢業到依家TVB工作,公司俾我多機會,有主持節目,功夫指導等,自己好享受呢個過程,學到好多嘢。」拍戲之餘,李嘉亦不忘練武,更創立體育會,於內地及台灣開班授徒,宣揚武學精神!另外,原來李嘉一直有個功夫夢,想好似已離世嘅武打巨星李小龍一樣,拍出代表作:「如果有機會,希望將功夫喺電影銀幕表現出來,因為電影創作空間上比較大,希望將自己心目中功夫呈現喺大銀幕,有朝一日,觀眾諗到功夫就諗到自己。」

全文完