為愛同閨蜜JW反面 G.E.M. 開騷前拖仔喪食

「宇宙G.E.M.」鄧紫棋近年話要回歸本地樂壇,年初被踢爆與閨蜜JW (王灝兒)有米前男友Mark Ngai拍拖,G.E.M.仲口硬話對方只係造型師,但紙包唔住火,Mark 24小時貼身服侍,上月生日仲送紅玫瑰包場開P,戀情終於浮面。拍拖後的G.E.M.與JW姊妹情不再,日前JW更公開認二人甚少聯絡。不過G.E.M.一於少理,日前拖仔放縱開餐,叫到一枱都係嘢食,有仔陪食特別好胃口,睇嚟G.E.M.預咗身懷巨躉肉腿開騷贈歌迷。

G.E.M. 為愛同閨蜜JW反面

G.E.M.與JW出道背景相若,讀書時期參加歌唱比賽備受唱片公司賞識,二人同聲同氣成為好姊妹,不時約埋何超蓮一齊玩。兩年前JW被爆與富三代Mark Ngai拍拖,至去年一月,有傳G.E.M.硬搶Mark,兩女更為爭仔而反目,之後JW與Mark分手,後被影到與卓悅太子爺葉韋彤拍拖。

JW與Mark識於微時,早年拍拖與男家屋企人已打成一片,高大靚仔的Mark Ngai外公是關之琳首任丈夫王國旌,祖父王啟宇則為第一代紗廠富商。媽咪Jannine則與「四洲太子女」戴凱欣,於中環合資開餐廳Room 28,富三代來頭絕不簡單。

 

當年JW與Mark拍拖,一大班朋友不時相約食飯玩得好埋,有傳Mark與G.E.M.傳出緋聞後,二女即鬧不和。

JW:「我哋依家甚少聯絡!」

雖然自己搵到第二個筍盤,但JW對G.E.M.與Mark拍拖始終未能釋懷,日前她出席公開活動時被問及與G.E.M.可有見面,JW直言:「我哋依家甚少聯絡!」你有你嬲嬲豬,G.E.M.繼續瘟仔。今年四月G.E.M.拖住Mark蜜遊日本東京,不過佢回應時堅持男方只是造型師,仲話結婚才會公開戀情。上月中 G.E.M.26歲生日,Mark在其母開的Room28為佢大搞驚喜生日派對,更在IG上載紅玫瑰相賀女友。

Mark拍拖後在G.E.M.寓所自出自入, 早前G.E.M.親手下廚大宴好友,男主人Mark同樣身穿紅色格仔恤衫現身。

G.E.M.孖男友喪食

男友做御用造型師,G.E.M.大條道理日見夜見。正在舉行世界巡迴個唱的G.E.M.,近日返港為香港站做準備。個個歌手開騷前都會食清啲操弗啲,不過G.E.M.就例外。日前本刊拍得素顏包到冚的G.E.M.與Mark到時代廣場食通天醫肚,入到食店後點了超過二人份量的食物,男友Mark質疑根本食唔晒,G.E.M.竟霸氣說:「出街梗係食多啲嘢㗎啦!」然後身體力行狂夾狂食。

G.E.M.與Mark在銅鑼灣時代廣場食通天的食店撐枱腳,叫到一枱都係嘢食的G.E.M.大啖啖食,雖然下周即將在紅館開騷,但水腫面浮現,狀態似乎麻麻。

 

開騷前肥嘟嘟

經過一小時喪食,G.E.M.與Mark離開食店行到隔籬戲院睇戲,見到本刊記者,G.E.M.雖然好避忌,但仍不忘叮囑攝影師:「唔該影得我瘦啲呀!哈哈!」現場所見,開騷前的G.E.M.身形依舊肥嘟嘟,雙腿好有肉地,再加上呢晚狂食冇節制,想影得瘦啲真係好有難度!

食完飯見本刊記者在場,頭戴情侶帽的G.E.M.與男友即保持距離。

 

Mark全程護花甚有風度,等入場睇戲時G.E.M.把自己塞入死角避鏡頭,更笑笑口話:「影得我瘦啲喎!哈哈!」

全文完