無綫力邀做親生仔 袁文傑 兩個月袋200萬

近年唔少亞視人逃亡去無綫搏一搏,視帝陳展鵬都要捱七年先掘起,高佬 袁文傑 卻一劇爆紅,早前憑劇集《不懂撒嬌的女人》大老闆游生一角人氣急升!人紅自然財源滾滾來, 袁文傑 近月頻頻拍廣告、出活動、做代言,兩個月估計袋200萬元!去年 袁文傑 與無綫簽的只是部頭約,肥水不流別人田,無綫欲招攬佢成為親生仔簽經理人合約。依家有自由又有錢賺,做親生仔即是要受困綁, 袁文傑 都係諗諗先!

袁文傑《不懂撒嬌》游生爆紅

一劇爆紅不是夢, 袁文傑 自演出無綫劇《不懂撒嬌的女人》霸氣游生一角後,工作接踵而來,由於佢同無綫的合約是部頭形式,所以接job方面是自由身,只要不影響拍劇工作,都可以自由在外接洽工作,最近接的廣告、代言都不用抽佣,可謂豬籠入水!

 

袁文傑唔止時裝游生look受歡迎,最近更變身古裝人連拍兩套古裝劇《天命》及《宮心計2深宮計》,連月頻頻到橫店拍外景,日曬雨淋都幾辛苦。

兩個月袋200萬

據知有唔少客戶都透過無綫想搵 袁文傑 做嘢,但佢始終唔係無綫親生仔,傾起上嚟唔太方便。於是大台誠邀佢簽經理人合約,除了人工吸引外,更承諾力捧佢做男一!但事實上,袁文傑近兩個月已拍了多個廣告及接了不少代言及商場活動,出去做個細event都收15萬,廣告都50萬起錶,保守估計已穩袋200萬!如果簽經理人,分分鐘要同公司瓜分半成血汗錢。所以佢好大機會唔應承,寧願自己辛苦啲,有job自己傾!

儲夠錢就結婚

對於人氣急升工作漸多, 袁文傑 直認不諱:「係多咗工作,忙係好事,亦有部電影洽談,希望可以影視雙棲發展,有更多工作,我都想賺多啲錢買樓。」另外袁文傑與前無綫兒童節目主持Jackeline姐姐(張潔蓮)拍拖六年,佢笑言要先儲夠買樓首期才可以娶老婆,照依家游生的吸金能力,睇嚟Jaqualine姐姐唔使等好耐!

全文完