無綫勒令減肥 坤哥 誓要搣甩豬腩肉

吳業坤 (坤哥 ) 去年憑一曲〈原來她不夠愛我〉,橫掃各大頒獎禮成為大贏家,不單身價急升,連帶身形都一併膨脹!於是無綫與唱片公司下令極速瘦身,向來唔注重外表的坤哥不敢怠慢,最近找了健身教練幫拖。但係佢本身體虛又虧,往往未能達標,教練都無哂佢乎。日前本刊記者目擊仍然豬腩肉隨身的坤哥喺健身房地獄式減肥,可見佢上氣唔接下氣,個樣仲極度痛苦,慘過台慶做隻棋!

圖片來源︰新傳媒、微博、《殭》截圖

今年26歲的坤哥,以四眼仔毒男形象見稱,去年憑一首歌成功越級揮低陳奕迅,在頒奬禮上擸盡歌曲大獎,更以僅出過兩張碟而能登上歌手們的終極目標,8月在紅館舉行演唱會。坤哥人紅收入升,吸金力強,吸脂力更勁,腰間豬腩肉凸現,上載至社交媒體的相片也要遮去豬腩肉才貼出來。早前他拍攝劇集《殭》要赤裸上身,豬腩肉現形,相當嚇人﹗

眼見坤哥近排肥左成個碼,唱片公司都睇唔過眼,命令佢喺頒獎禮前減肥,告別毒男形象。日前坤哥收工即到北角健身房,換上背心短打,拉筋後就開始做不同器械。坤哥以一雙鬆泡泡手臂,用盡洪荒之力都只喺將器械推前兩小步。教練最初不停看錶出聲鞭策,唔俾坤哥暫停,之不過坤哥多次未能完成教練要求。

教練見坤哥推鐵部分未能達標,將難度稍為降低轉做另一器械,坤哥紮行馬雙手拎住鐵球前後擺動,集中操手臂,可惜坤哥未能一口氣完成整套動作,仲不時要坐低抖抖,教練都冇晒佢符,半抖半操加熱身近兩小時,終於落堂,坤哥好似軍訓完一樣,謝晒龜速步行去攞車返歸。

雖然坤哥對外形唔嗲唔吊,但對獎項絕對着緊,近日更親自到不到電台派歌,知情者爆:「雖然唱片公司有人會去電台,但坤哥堅持親自去,商台仲連續去咗幾日,佢舊年攞咗我最喜愛歌曲,梗係想冧莊啦。」但坤哥今時唔同往日,不單要出席各大頒獎禮,又在新劇擔任劇份重的角色,唔努力減肥點得!

 

全文完