熊黛林

熊黛林陀五個月慈姑椗 老公叩頭還神

熊黛林15年嫁家族擁百億身家的郭可頌,肩負幫郭家開枝散葉重任,兩公婆努力一年,上年11月終於宣佈有喜!由於37歲高齡陀B,奶奶更緊張到日日煲湯去兒子屋企睇實新抱。不過熊黛林不時都搵老公陪伴外出鬆一鬆,早前就加埋腹中B仔享受三人世界迎新年!

據知去年中,熊黛林同老公曾到荃灣龍母廟跪叩求子,現成功陀住五個月慈姑椗,故日前郭可頌聯同親友帶埋燒肉果籃等祭品,到龍母廟叩頭還神,為未出世的兒子祈福。

熊黛林 獲奶奶錫到燶

近年已接手打理屋企家族生意的郭可頌,上有兩個胞姊,及一個妹妹,當中家姐郭可盈早已出晒名,由於係家中唯一男丁,熊黛林成功陀住金叵羅,幫郭家開枝散葉,奶奶幾乎每天都煲湯水照顧新抱!據知熊黛林未嫁時已經融入郭家,成日出席男友家庭聚會,同未來奶奶姑奶關係好好。結婚之後奶奶更加錫佢,知道新抱有咗,就幾乎日日煲湯水過去阿仔屋企,又吩咐工人要煮啲清淡菜式畀新抱食!

熊黛林郭可頌撐枱腳

12月30日傍晚,閉關安胎多時的熊黛林,先陪老公返柴灣公司,逗留約20分鐘,之後二人再坐車去香港遊艇會,原來當晚郭可頌已經book定枱,同老婆撐枱腳迎接新年,與腹中BB過三人世界!

郭可頌出名是「愛妻號」,對老婆照顧周到的他,當日還幫愛妻阿Lynn開埋車門,十分細心!

 

近日寓所鄰居裝修,搞到阿Lynn冇覺好瞓,當日素顏出街的她,睇落就有啲憔悴。

 

熊黛林 摸龍床寫願望

熊黛林同老公婚後都心急生B,據知去年中兩人專誠到荃灣龍母廟求子,在廟裏跪地又叩頭,之後亦跟足規矩去摸龍床寫願望。點知真係唔夠一個月,熊黛林就成功陀仔,所以好緊張計劃返廟還神!不過,為免老婆挺住五個月肚操勞,日前郭可頌就聯同親友帶齊燒肉及果籃,到龍母廟誠心叩頭還神,答謝龍母娘娘賜福!

郭可頌求子成功,日前專登帶備燒肉果籃,誠心去龍母廟還神。

 

郭可頌同廟祝買香燭等祭品,然後就坐低等候,當日更誠心跪地叩頭還神,答謝龍母娘娘。
等候還神期間,郭可頌不停睇手機,同老婆保持聯絡!

 

還神個多小時,郭可頌離開時狂飲水解渴,之後與兩位親友一齊攞車離開。

求子必拜

位於荃灣上角山的龍母廟建寺60年,雖然位處偏僻,不過長年香火鼎盛,好多明星名人如張智霖、楊怡、黎諾懿都是信眾。人們多拜龍母娘娘求子,更必定摸龍床求好運求生子,而龍母亦對小孩特別眷顧,所以亦有不少家長帶埋子女上山拜龍母,求子女健康成長。