狗年媽媽出籠 吳雨霏、熊黛林、葉翠翠輪住生

最新娛聞

新一年娛樂圈喜事重重,今年特別旺丁,除上月開心宣布有喜嘅吳雨霏之外,仲有熊黛林、葉翠翠、Jessica C.、方皓玟、Ana R.、陳倩揚、蔣怡都有咗,實行齊齊陀狗B。

撰文:東方新地

圖片:Instagram、東星

吳雨霏 失而復得

前年曾經歷小產之痛,吳雨霏(Kary)與丈夫洪立熙Brian互相扶持下走出傷痛,日前Kary喺IG貼大肚相宣布懷孕5個月,Kary現暫停出席所有活動,專心養胎,靜靜迎接小生命來臨。

熊黛林 得償所願

熊黛林前年跟家族坐擁百億資產嘅郭可盈細佬郭可頌結婚後,一直好恨生B,去年尾終於得償所願宣佈佗B,現正閉關安胎。

葉翠翠 望仔唔望女

去年四月至為建築公司董事老公Raymond誕下囝囝周津羲(Jake),葉翠翠再次宣布有喜,預產期為今年六月,葉翠翠話希望再添多個囝囝:「老公鍾意仔,話可以陪他玩。生女會擔心啲,依家有啲女仔12歲就話拍拖,好驚。如果生女,日日都要接佢返學放學,所以生仔會較放心。」

Jessica C.想生夠三個

Jessica C跟打星安志 杰(Andy)於2015年10月喺馬爾代夫訂婚,同年3月囡囡Tessa喺美國出生,去年10月正式喺夏威夷結婚。JC早前宣布再做媽咪,佢話只要健康仔女都冇所謂。

方晧玟 留港生產

去年5月與日籍模特兒安田慎吾結婚嘅方皓玟,去年底喺IG貼咗張超聲波照片,並留言:「感謝上天給我的禮物, It’s a boy」。

Ana R.保持神秘

Ana R.同英籍老公Brad育有兩歲幾囡囡Maya,Ana喺IG宣佈再陀B,現已懷孕四個多月,預產期喺7、8月,目前已知BB 性別,但為保留神秘感唔公開住。

陳倩揚 恨生女

兩子之母陳倩揚現懷孕4 個多月,雖然暫時仍未知胎兒性別,但佢承認好恨追番個女。

蔣怡 意外驚喜

現年40歲嘅蔣怡將再做媽咪,已育有一女嘅CoCo現懷有五個多月身孕,CoCo同珠寶設計師老公翁狄森曾揚言「一個夠晒數」,今次意外有喜,兩公婆都話好意外!

讀者留言