猴擒攬啜翠如 Bosco明剃蕭正楠眼眉
廣告
無綫小生筍盤愈來愈少，近年進軍飲食業又坐擁半億物業的黃宗澤 (Bosco) 絕對係筍盤，佢與 黃翠如 多次合作拍劇，親熱kiss戲拍到爛，仲搞到翠如男友蕭正楠打爛醋酲！最近拍《溏心風暴3》，Bosco與翠如又再埋牙，日前在迪士尼拍外景，鏡頭前兩人在童話世界浪漫啜爆，鏡頭後Bosco對翠如依然猴擒，捉手臂一齊玩手機，飯後又旁若無人攬到實，明剃蕭正楠眼眉喎！
拍《幕後玩家》變兄弟
Bosco向來媾女唔眨眼，去年佢同翠如合作《幕後玩家》時已經有親熱戲，今次《溏心風暴3》再演情侶，蕭正楠呷晒大醋！不過劇情需要冇得揀，據知翠如惟有每次事前都同男友備定案。而為減輕蕭正楠醋意，Bosco早前公開表示自從拍完《幕後玩家》，與翠如、蕭正楠和張繼聰成了四兄弟，此後與翠如名正言順玩到癲，不時有身體接觸！
箍實睇劇本
拍至晚上7時全劇組到中餐廳放飯，飯後小休時，Bosco拿出劇本與翠如一齊睇，期間佢突然出手箍實翠如條頸，令對方挨近自己，只見翠如照單全收，未有半點抗拒。呢一幕攬到實旁若無人！就連坐喺一旁的韋家雄亦見怪不怪，扮睇唔到。
蜜遊迪士尼
難得去到主題公園取景，翠如同Bosco兩個大細路邊拍邊玩，難理樂園人頭湧湧，不停畀自由行影相。見翠如好鍾意戴卡通帽扮cute，Bosco亦細心地為佢整理，然後攬埋一嚿笑到癲。
「澤楠」相遇零交流
兩男相遇，唔通真係份外眼紅？日前蕭正楠與Bosco在將軍澳電視城的飯堂相遇，Bosco與助手拍完外景返廠，而拍緊《宮心計》的蕭正楠就與馬明同枱食飯。「澤楠」一個坐東一個坐西，見到面都冇兩句。
黃宗澤回應
被指搞到蕭正楠呷醋，Bosco日前接受本刊訪問表示，佢同翠如仲有蕭正楠係三兄弟，經常都會玩到好癲。如果要呷醋的話，上次《幕後玩家》咪仲激！咁點解同蕭正楠喺飯堂見到都各自食飯，冇打招呼呢？Bosco就話佢哋其實有打招呼，不過各自食飯咁解，仲反問係咪想傳兩人不和，為《溏心風暴3》同《深宮計》做宣傳！
