生煎包開新店 Oscar晒愛的紋身 江若琳同未來奶奶勁老友

手揸七間食店、人稱「生煎皇」的前藝人(蕭潤邦) Oscar,早前正式公開與女友 江若琳 (Elaine)的戀情,網上放閃都未夠,Oscar更在左手紋上代表女友英文名Elaine的「E」字愛的紋身,閃死人!今日Oscar位於大埔的生煎包新店開張,Elaine當然以女主人身分在場招呼朋友,與未來奶奶齊齊切燒豬。之後兩人受訪時不時冧爆望實對方,又話將來有任何困難都會一齊面對,閃死人!

Oscar 江若琳 高調晒戀情

近年長期在內地工作的江若琳近月高調宣佈重返香港樂壇,還罕有地自爆戀情,與男友Oscar在IG齊齊開心分享:「找到愛我的人!」二人07年一同入行成為樂壇新人,十年來一直保持聯絡,突然認愛令身邊好友都非常愕然!

 

今日Oscar位於大埔的生煎包新店開張,女友Elaine當然到場支持,仲同未來奶奶黐到實,齊齊切燒豬!Elaine透露與蕭媽媽經常都見面,因為常常在Oscar的各家食店現身,不時都會一齊去食飯。Oscar稱媽媽大讚Elaine好又乖又純品,而Elaine就表示蕭媽媽不單外表貌年輕,而且仲有一顆少女的心,比自己更少女!所以兩人相處得非常融洽,冇壓力!

 

呢日大家最關心的,當然係Oscar左手上「愛的紋身」!原來係Oscar有位做紋身師傅的朋友新店開張,問到佢有咩字母可以代表自己的人生,於是Oscar就決定紋個「E」字,將女友個名紋上身!Elaine事前並唔知道,所以又驚喜又開心!佢話估唔到Oscar平時木木獨獨,原來咁識得製造浪漫!

 

其實Oscar同Elaine都相識咗唔短時間,點解突然會擦出愛火?Oscar就話佢同Elaine過去十年間的經歷好相似,有高峰亦有低谷,大家都憑自己的努力捱到今時今日,所以兩個人非常夾!

而Elaine就讚Oscar好成熟,欣賞對方好有拼勁,今天的成就都係佢自己一個人一切從零開始,呢種精神好吸引!兩人都已經視對方為終身伴侶,不過覺得唔一定係要好快結婚,反正仲會一齊一段好長的日子,任何困難都會一齊面對!Elaine同Oscar接受訪問時不時冧爆望實對方,由心而發的笑容特別甜美,好Sweet!

全文完