「生蛇」痛到似針拮 蕭正楠拍《翻生武林》焗停廠
香港人工作繁忙生活忙碌，尤其是名人明星，工作不定時壓力又大，免疫力容易變差，一個唔覺意隨時「生蛇」(醫學上稱帶狀疱疹感染)！好似蕭正楠咁，原來佢早年拍《翻生武林》期間不幸「生蛇」，最初有啲痕，之後就愈來愈痛，痛到似畀針拮咁！而陳慧琳、林保怡同顏卓靈也曾深受其害， 除了會紅腫爛肉嚇親人，又要食抗病毒藥控制。如果病情嚴重，分分鐘會眼盲或耳聾，唔講得笑！
撰文：東方新地
蕭正楠 生蛇痛到停工
蕭正楠當年趕拍《翻生武林》嘅同時，又要為《巨輪II》宣傳，太忙長期唔夠瞓下搞到抵抗力下降，成個背脊生晒蛇！蕭正楠話當時背脊有啲痛，隔兩日仲愈生愈多，要食抗生素控制，而且拍攝時要就住傷口，否則一掂到就會痛！甚少請假的蕭正楠曾經痛到要停廠一晚休息，難怪女友黃翠如都大感心痛﹐除咗介紹醫生畀男友，翠如媽咪仲煲埋愛心蟲草湯畀未來女婿飲！
陳慧琳生蛇 右手花晒
其實唔少藝人都試過「生蛇」，好似陳慧琳Kelly喺14年自爆「生蛇」，佢話因為細個曾經生過水痘，體內剩番少少菌引致「生蛇」。當時右手手心同右臂都有大大笪紅印，嚇到坐隔離嘅古天樂即刻彈開！
陳慧琳話佢黐晒膠布，在家中亦會着長袖衫，所以肯定唔會傳染俾老公同兩個囝囝喎！
顏卓靈生蛇 背脊留疤
年僅22歲的顏卓靈，當年日忙夜忙宣傳電影《狂舞派》，同時亦要應付考慮，結果壓力爆煲。當時Cherry背脊又痕又痛，以為只係只係皮膚敏感，自把自為搽類固醇，反而令病情惡化，現時背脊仍留有疤痕，着露背裝都要用厚粉遮住！
林保怡「蛇粒」纏腰
10年時，林保怡自爆腰間突然生了一堆粒粒，初時以為被蝨咬，但試過各種止痕方法都冇用，過一排更開始痛，粒粒仲生到去身前。當時同林保怡一齊拍電視劇《讀心神探》的田蕊妮都見過對方有幾痛苦，好彩最後食藥可以控制到，大約兩至三個星期即完全康復！
