皓鑭傳

《延禧》班底回歸新劇《皓鑭傳》 本周六鐵定正式開播!

上年《延禧攻略》爆紅三地,而由同劇嘅同班人馬新作《皓鑭傳》亦即將於今個星期六(19日)開播!從官方已經釋出嘅預告片睇到唔少極具講究嘅場面,加上吳謹言飾演李皓鑭嘅自白,睇嚟新劇除會上演宮鬥場面之餘,仲會有一段段愛恨情愁!

撰文:東方新地|圖片:皓鑭傳官博于正譚卓微博、影片截圖

《延禧》班底回歸新劇《皓鑭傳》

根據《皓鑭傳》劇組公布資料,新劇沿用唔少《延》班底演員,當中當然唔少得大家非常熟識嘅「魏瓔珞」吳謹言同「乾隆」聶遠,但今次就會嚟個換時空令二人可以再續前緣!

除咗兩位男女主角,《延》嘅「高貴妃」譚卓、「明玉」姜梓新、「李玉公公」劉恩尚及令人睇到恨之入骨嘅「袁春望」王茂蕾都有份參演《皓鑭傳》!

今次喺《皓》中,「明玉」姜梓新飾演醫術高明嘅「殷小春」,擅長用銀針替人治病,亦會處處幫助女主角李皓鑭;

「高貴妃」譚卓於新劇中升呢飾演「華陽夫人」,係秦孝文王嘅王后,同吳謹言嘅角色關係係婆媳!

至於喺《延禧攻略》做「乾隆」嘅聶遠今次唔做皇帝,而係做秦國商人呂不韋!

新加入《延》班底演員

32歲嘅茅子俊曾和林心如於《美人心計》合作,但都係做二線角色,今次擔正于正嘅新戲,飾演秦莊襄王「贏異人」,睇嚟上位在望!


至於「趙國公主雅」會由海鈴出演;「厲夫人」則由內地著名影星寧靜飾演!

宮鬥之餘仲會有…

喺官方釋出嘅預告片中,見到《皓》以戰國晚期為背景,講述吳謹言飾演嘅李皓鑭由趙國御史之女淪為舞姬,最後再成秦始皇嬴政之母嘅過程,當然過程中會包括唔少宮鬥嘅場面,甚至會出現朝堂上嘅權鬥角力!

另外,預告片頭就已經有吳謹言飾演李皓鑭嘅自白:「如果真切的愛慕一個人,哪怕受盡傷害也不改初衷。」,睇嚟新劇仲會有揪心嘅感情線,希望唔好又好似上次《延》咁慘啦!

劇集製作一絲不苟

據知,今次《皓》嘅拍攝同樣極具講究,為咗令劇集場景可以還原及貼近史實,拍攝一共搭建多達400個場景,共花費8個月嘅時間,其中一個最大嘅場景仲接近3萬平方米,製作規模都唔細!

除此以外,據了解《皓》嘅劇組更對道具及服飾製作一絲不苟,如劇情轉入秦國後,劇組則多用黑及紅色,並配以獸型圖案於服飾中,以表達秦人嘅霸氣同豪放!