陳奕迅 eason

睇世界盃惹是非 陳奕迅泊車阻街勁耍冧

最新娛聞

廣告

四年一度,世界盃又開波!你捱咗幾晚夜?今日又飲咗杯啡提咗神未?

為睇波,瞓少啲是必須的,唔夠瞓自然燥底啲亦都情有可原,更何況私人時間拍住經理人去睇場波,都被歌迷圍住嚟影?又難怪歌神陳奕迅今次火都嚟,被影到喺世界盃開鑼戰俄羅斯現場當眾舉中指。

其實出名真性情的Eason都識克制自己亦知書識禮嘅,日前為買杯提神啡而double park有阻交通,Eason飛奔去移車都識笑笑口向其他車主耍個冧先,絕對唔會下下動真火!

撰文:東方新地|圖片:新傳媒圖片庫、Eason FB

陳奕迅 為杯啡阻街

世界盃打到嚟,除咗日見夜見班球星,代言多多嘅陳奕迅亦都曝光率奇高。除咗運動品牌、按摩椅又代言埋指定啤酒飲品,今屆世界盃Eason就被品牌邀請飛到去俄羅斯坐喺VIP區睇開鑼戰。戰後被指唔好老脾舉中指後,經理人甘菁菁即時解畫:「當時好多中國fans發現Eason,初時Eason來者不拒,後來愈來愈混亂,勸喻大家返埋位唔好影響其他人,但開場有啲偷拍、有啲蜂擁而上,搞到外國男觀眾被迫到,Eason想控制場面,令大家唔好偷拍;但個外國男球迷覺得Eason引起咗混亂,竟然舉中指鬧他,更以粗口相向,Eason所以會舉中指回應。」

所以話唔好跟車太貼鬧Eason脾氣差,原來係以眼還眼保護緊班Fans。日前Eason自駕去到九龍城,一心想買杯啡嚟提神,點知泊埋一邊等足十分鐘都未有車離開,惟有雙線違泊、打算放低架車快去快回。由泊車點到商場地下咖啡連鎖店,短短三分鐘路程Eason都醒水來回加快步伐大步跑,前後十分鐘內極速買完杯熱啡返到座駕前,原來旁車司機已經返回發現被阻。知道自己理虧,Eason嗱嗱聲行快兩步、堆滿笑容又伸手畀人「五蚊」以示歉意,見到阻街司機係歌神、對方仲耍晒冧,自然都嬲唔落各自開車走人。

徐濠縈著大露背買叉燒

徐濠縈近日於個人社交網上載自己單拖落街買燒味,原來係為慶祝老公陳奕迅(Eason)喺台灣金曲頒獎禮中,三度奪得歌王寶座兼贏埋年度專輯大獎。雖然只係出街買叉燒,但不嬲走喺潮流尖端嘅啊徐就著上一件大露背,唔講仲以為佢準備出席咩活動。

#斬料斬料斬大舊叉燒 #賀賀佢 #陳師奶 📷 乖女
hilary tsui(@hilaryxtsui)分享的貼文 於 張貼

徐濠縈仲留言指:「斬料、斬料、斬大舊叉燒,賀賀佢,陳師奶,乖女。」但重點就完全落喺呢件大露背,皆因呢件衫只要有小小肥都會Carry唔到,但阿徐完全唔使擔心呢個問題!

hilary tsui(@hilaryxtsui)分享的貼文 張貼

阿徐拎住一大袋叉燒戰利品時,仲要擺番個Pose影番張相,真係冇人潮得過佢!

hilary tsui(@hilaryxtsui)分享的貼文 張貼

拎住一大袋叉燒,阿徐唔少得行番個街頭Catwalk!

Eason、偉仔、張震 齊送吻

早前徐濠縈44歲生日,獲Eason、偉仔同張震三大男神一齊送祝福,開心到不停在派對上嘟咀派飛吻,仲舉埋V字手勢影相,而梁朝偉同Eason就鬥耍詠春,一大班人玩得勁開心!

阿徐話呢個已經係佢第三個生日蛋糕啦!

阿徐仲即場向老公Eason送吻放閃,睇到偉仔眼定定!

讀者留言