素顏真樣 林芊妤嚇人熊貓眼
林芊妤(Coffee)早前去旅行時自拍短片，示範高難度瑜伽動作，最近佢將短片上載至YouTube同大家分享！而每次做瑜伽之前，都會有唔同話題。Coffee於其中一集中，一開始就自拍浸浴，素顏上陣嘅佢雖然皮膚光滑，但黑眼圈頗深，勁似熊貓眼！
Coffee愈拍愈high，更做出唔同搞笑動作，擘大口及將泡泡放上頭等，自娛一番！
而喺另一集中，Coffee穿三點式晒body，又表示進食前唔好飲酒，否則會食量大增，影響身形！
做戲做全套，佢即扮忍唔住衝入度假屋內搵薯片食。
雖然素顏look幾嚇人，但Coffee做嘅瑜伽動作難度好高，尤其雙手撐起整個人後擘開雙腿，少啲臂力都做唔到！
之後Coffee又於浮喺海嘅滑浪板上做瑜伽，可見其身體平衡力好好！
