劉青雲

結婚20周年豪一次 劉青雲百萬波子冧郭藹明

劉青雲於98年與郭藹明結婚,這黑白配一凹一凸,是圈中公認的恩愛夫婦No.1,愛妻號劉青雲早年發表「太空船論」冧妻之餘亦冧盡天下女人,絕對唔係得個講字,一直以行動證明有幾愛郭藹明。

夫婦二人向來生活平實,劉青雲貴為多產影帝,閒閒地收千萬片酬,但他卻絕不揮霍,郭藹明更深明慳家之道,14年為裝修西貢獨立屋愛巢,老婆全程親力親為格價買料,慳得就慳,生活上所需亦平民到爆,不時見劉青雲與郭藹明去茶記醫肚。不過慳慳埋埋都總要豪一次,劉青雲趁住6月17日是二人結婚20周年紀念,大手筆買過百萬波子贈郭藹明。本刊記者日前直擊兩公婆去車行,郭藹明收禮時由心笑出來,劉青雲為博老婆一笑,百幾萬用得其所,絕對唔貴。

撰文:東方新地|圖片:新傳媒圖片庫

劉青雲 紀念日必慶祝

劉青雲當年與美貌與智慧並重的郭藹明相戀,外界普遍不太看好,但事實證明這對黑白配是絕配,今年是二人結婚20周年,沒有一兒半女的生活,二人激情如昔,年初在鬧市行街攬到實,黑實大男人劉青雲被keep 住少女情懷的郭藹明緊箍,可見夫妻關係歷久常新。

劉青雲
頭士畢業的郭藹明,婚前為劉青雲放棄返美國完成航天工程師的夢想,98年拉埋天窗,郭藹明婚後減少幕前演出,全職做其背後女人。15年劉青雲再奪金像影帝更發表愛的宣言:「我要多謝我太太,每次當我揸住隻太空船,飛到去宇宙唔知邊一度嘅時候, 你總係有辦法令我好安全咁返嚟地球,多謝!」

相敬如賓談何容易,但劉青雲說得出做得到,他是個心細如塵的好老公,每年的紀念日都一定有表示,知情者透露:「唔好睇青雲大大嚿又唧都唔笑,其實佢對Amy(郭藹明) 好溫柔同細心,每年生日、拍拖同結婚周年紀念佢都一定會諗定點慶祝,送咩禮物,就算忙住做嘢都會預先慶祝或者補祝,今年6月17日係佢哋結婚20周年,佢話咁多年嚟多得有個好老婆喺佢身邊扶持,要送份勁嘢畀Amy,早前託相熟車行搵車。平時佢哋唔係大花筒,有錢都唔會亂使,寧願穩陣投資買磚頭,青雲話如果Amy一早知道佢買貴車,一定會阻止佢,所以要秘密進行。」

劉青雲
劉青雲與郭藹明坐住司機駕駛的七人車到達位於紅磡的保時捷車行,夫婦二人同穿黑衣襯晒色,打扮樸實絕不花巧。

劉青雲

車行收禮

近年劉青雲與郭藹明一同外出,多數都由司機駕駛七人車接送,另有一輛寶馬房車及一輛平治房車代步,過去劉青雲買的車都偏向平實穩重款式,絕不會追求新款及速度感的跑車。據知劉青雲早前買入了一架過百萬的保時捷跑車(波子),送給郭藹明作為驚喜,日前更帶埋老婆去車行收禮,現場所見,夫婦二人乘七人車到達後,行入寫字樓辦妥手續,郭藹明雖然已知有車收,仍全程四萬咁口,興奮之情表露無遺,最後由職員帶領下去取車,波子早已掛上二人專用的私人車牌號碼,由劉青雲負責開車揸走。

收禮前郭藹明在保時捷寫字樓內辦理手續,之後步行去拎車,見她keep住甜笑,一切盡在不言中。
劉青雲
在保時捷職員帶領下,劉青雲與郭藹明坐上銀灰色波子,愛實務低調的夫婦,揀跑車都揀樸素的銀灰色。
劉青雲
登上波子後,劉青雲負責做司機,架車咁的骰,真係好襯郭藹明。

高血壓放棄生育

有老公送贈百萬波子做結婚紀念禮物,有邊個女人會唔冧?對從來不愛追求物質生活的郭藹明來說,劉青雲對她的心意肯定重要過架波子,而事實上這個廿四孝老婆值得擁有更多。50歲的郭藹明,98年嫁劉青雲後一直做其背後的女人,老公拍戲愈來愈紅愈賺愈多,她就負責管財投資錢滾錢,打理家頭細務又學煮餸煲湯。亦因為劉青雲有先天性高血壓,嚴重會影響到心臟,郭藹明多年來都為老公的飲食操心,只要劉青雲在香港,她都會度定菜單親自下廚,務求令劉青雲食得健康。據知因為先天性高血壓有遺傳的可能,早年曾放風想生B 的劉青雲與郭藹明,最後亦有共識放棄生兒育女,好好享受二人世界。

劉青雲
劉青雲揸到去土瓜灣的寶馬車行下車, 由郭藹明坐上司機位,把波子揸走。此時郭藹明見到本刊記者,心情大靚繼續笑容滿面。
劉青雲
原來劉青雲要去車行拎番自己架寶馬房車,入到去已有為數不少的車行職員列隊等他合照,親民影帝來者不拒逐一影完合照先走得。

劉青雲

劉青雲曾揚言感激郭藹明多年來的犧牲,女人最能幹不是在外搏殺搵幾多錢,而是肯為另一半照顧頭家,郭藹明懂得為婚姻保鮮,她坦言目前是她的收成期,多年來努力經營沒有白費,尤其是劉青雲對飲食有要求,郭藹明說:「老公以前唔鍾意返屋企食飯,可能我煮得唔好食,又唔會同朋友講個老婆識煮嘢,家陣佢會話:『佢都煮得OK!』」

這日下午2時,郭藹明一個人行去九龍城的麵店醫肚,食飽飽拎住杯熱飲步出,找回的20蚊即時攝入褲袋,好率性。

街市走幾轉

由五光十色的幕前生活轉戰到大汗疊細汗的廚房,郭藹明決心做個好老婆,當日收車之前的幾個鐘,本刊記者見她獨自在九龍城茶記食牛腩麵,之後到街市買餸,買完牛肉同菜先放上七人車,再折返街市拎雞,連走幾轉辛苦到暈,不過從劉太臉上可見成功感。持家有道的郭藹明唔止入 得廚房,仲係出得廳堂的港姐冠軍老婆,如果劉青雲要論功行賞,結婚20周年就送波子,再遲啲應該要送太空船同穿梭機先得喇!

街市熟客仔郭藹明穿梭濕漉漉的街市唔怕污糟,堅持買新鮮食材自度健康餐單慰老公劉青雲,見她與肉檔老闆娘好好傾。
郭藹明到九龍城街市買餸,拎住幾袋餸放上七人車又再折返街市繼續買,睇見都覺辛苦。