羅仲謙

羅仲謙結婚近兩年 唔強求生B

羅仲謙同楊怡嘅感情由拍拖到結婚都備受傳媒追訪,近日更有好多人追問佢哋幾時生B,羅仲謙就指自己冇時間表:「我同老婆之間已經有個默契,生BB唔會強求!」更賣口乖表白自己擺喺第一位嘅唔係生BB,而係佢老婆,認真sweet!

撰文:東方新地

圖片:新傳媒圖片庫、羅仲謙fb

羅仲謙 低調拍拖結婚

羅仲謙同楊怡2016年到英國古堡舉行秘密婚禮,問到佢當年結婚點解咁神秘?羅仲謙笑言:「唔好話結婚咁神秘,我連拍拖都好低調,因為我覺得兩個公眾人物如果太高調,傳媒就會你拍咩戲、同咩女對手,甚至同個朋友、同個女助手出街都可以變成緋聞,兩個人之間係靠信任,但傳媒嘅力量都幾大,你一次、兩次,到第十次⋯⋯梗會有少少影響,所以愈低調,其實感情反而會保存得更加好,唔會有其他外界嘅力量干擾到。至於結婚,我同我老婆都希望可以浪漫啲,因為難得可以去英國嘅城堡影相、少少童話啲嘅感覺,我哋又同埋屋企人一齊去,唔想有傳媒喺度,大家會冇咁盡興,結婚一生人一次,最真實嘅一面,我想留番畀自己!」

羅仲謙
當年到英國古堡舉行秘密婚禮,羅仲謙話同老婆楊怡都希望可以將一生一次嘅浪漫婚禮留番畀自己欣賞,唔想公開。
羅仲謙
羅仲謙笑言若生B有得揀,「呢兩年想生女仔。因為我見到身邊朋友啲小朋友,女仔係比較黐爸爸,如果再生個仔,我會被孤立,喺屋企冇晒勢力,哈哈!」

老婆擺第一位

講到兩人由拍拖到結婚都有好多閒言閒語,問羅仲謙覺得算唔算精誠所至?佢笑:「我唔會用呢啲咁靚嘅字嚟形容,只不過我覺得喺適當嘅時候做適當嘅嘢,同埋我自己本人係需要阿怡呢種咁獨立嘅女性做太太,咁會令我快啲成長!」而問到佢生仔嘅計劃,羅仲謙就話:「我冇時間表,一段感情拍拖、結婚、生仔都會受傳媒嘅追訪,或者好多人都會問幾時生仔,問得多都會構成壓力,其實我同我老婆之間已經有個默契,生BB唔強求。其實生BB唔係淨係女人嘅事,男人係佔咗好大部分,我呢兩年都少喺香港,變咗好多嘢唔能夠強求,我自己擺第一位唔係生BB,第一位都係我老婆,我覺得隨緣啦!」

羅仲謙
講到買樓投資,羅仲謙話抽過好多次新樓盤都落空,改為轉戰工廈,「其實我都係計數,工廈嘅市場都幾大,我攞嘅成本同我收番嚟嘅回報,好似比住宅更好,咁咪決定去投資。買樓真係要機遇,依家好難追、好誇張。」
羅仲謙
羅仲謙話自己呢兩年北上拍戲,好少時間喺香港,所以生B嘅嘢唔能夠強求。
羅仲謙
羅仲謙甜讚太太楊怡性格獨立,可以令佢快啲成長。
羅仲謙
羅仲謙喺內地拍戲時,一放假就會買機票飛返香港會老婆,超sweet!