羅仲謙談夫妻相處之道:缺點要收埋

最新娛聞

羅仲謙同楊怡拍拖、結婚到現在已經歷七年時間,佢話兩人之間冇可能冇拗撬,但依家佢覺得兩公婆相敬如賓好緊要:「可能大家因為恃住感情耐咗,有啲嘢會放縱咗,譬如你追佢嘅時候,會將自己嘅缺點收埋、優點放大,但點解結婚之後唔得呢?」

撰文:東方新地
圖片:新傳媒圖片庫

羅仲謙 一放假即撲返港

羅仲謙近兩年在內地拍戲,成日要兩地飛,問到佢哋有幾多時間見面?羅仲謙話:「依家我會覺得我嘅休息時間係唔重要,我喺大陸拍戲,今日唔知聽日事,未必知聽日係返工定放假,好多時我一知道放假,就即刻訂機票,未天光我已經返到香港,十二點派通告話連放三日,我五點已經返到香港,哈哈!幾趕呀!老婆未瞓醒,擘大眼已經見到我。」

家庭工作兩邊平衡

羅仲謙表示佢一放假就直接返香港,係因為唔想miss咗任何嘢:「我追求工作、有鬥心,想賺更多嘅錢,得到更多嘅機會,但同樣我同自己講,唔可以用有限嘅嘢去追無限嘅嘢,咁唔代表我冇鬥心,只不過我係隨緣、平衡。我又可以開到工,又可以照顧到屋企人,係自己嘅時間冇咗啫,我覺得冇辦法啦,要顧兩邊平衡,就要犧牲呢啲嘢。」

兩公婆都係處女座

問到楊怡係咩類型嘅太太?會唔會做家務、煮飯?羅仲謙就笑言:「佢會做家務、煮飯,同埋唔係大家表面睇到咁硬淨、咁強,佢係一個好照料我身體嘅太太,成日擔心我食唔好,食得多唔好嘅油,我又鍾意飲汽水,佢就迫我戒汽水,哈哈哈哈!凍又驚我唔著衫,因為我喺圍村大,凍慣,大家成長環境好唔同,我同佢都係處女座,所以大家性格相似嘅時候,我明白佢嘅出發點,好多不必要嘅爭拗就可以避免。」

缺點收埋優點放大

羅仲謙指兩公婆拍拖同結婚都七年,冇可能冇拗撬:「但我覺得情侶之間嗌交永遠都係芝麻綠豆事引起,依家我會學識冷靜吓,我睇吓報紙,佢上吓網購物,就唔記得咗。唔好畀件事發酵,我幾鍾意中國人有句說話──相敬如賓,兩公婆無論幾多年感情都好,我覺得相敬如賓好緊要,可能大家因為恃住感情耐咗,有啲嘢放縱咗,譬如你追佢嘅時候,會將自己嘅缺點收埋、放大優點,但點解結婚之後唔得呢?」

讀者留言