羅仲謙

羅仲謙讚內地拍戲待遇好

無綫熱播劇集《無間道》近日殺入結局篇,主角之一嘅羅仲謙大談劇中嘅角色,並比較返內地拍戲同喺TVB拍劇嘅分別,大讚內地拍戲待遇好好,衣食住行都有專人照顧,但亦指返TVB拍劇時演員同幕後都會一齊食飯:「係好玩嘅!」

撰文:東方新地

圖片:新傳媒圖片庫

羅仲謙 演《無間道》𦧲飯應

羅仲謙表示自己對上一部喺TVB拍嘅劇集已經係兩年前 (指《潮流教主》),所以好期待觀眾再次睇佢喺電視劇中嘅演出:「尤其係一部咁大嘅劇!當初梁家樹先生搵我,話佢開電視劇,問我有冇興趣同佢合作,我話梗係好啦,我哋呢一輩演員最需要嘅就係機會,當知道係演《無間道》,仲要係類似劉德華嘅角色,我即刻連飯都噴埋出嚟,𦧲飯應啦!」佢又指今次主要故事架構係電影版嘅延續,一開始講蘇麗珊係梁朝偉個女,係講下一輩嘅事:「我係其中一個黑警,所以唔係同劉德華一個角色,係一個新角色嚟。」

羅仲謙
羅仲謙話當知道自己有機會演《無間道》入面類似劉德華嘅角色,即刻連飯都噴埋出嚟,𦧲飯應!
羅仲謙
羅仲謙對上一部TVB劇係兩年前嘅《潮流教主》,同李佳芯做一對。

無奈做黑警

問到羅仲謙喺《無間道》入面嘅角色算唔算係奸角?佢話:「其實我角色似悲劇人物多啲,因為佢個家庭係有困難,弱勢家庭,畀人欺負,十零歲嘅時候撈家 (羅嘉良) 就睇中呢個𡃁仔嘅情況,好似神仙咁供書教學,培養到佢做警隊精英,幫有黑社會背景嘅撈家做嘢。但其實佢慢慢畀警隊薰陶,真係想除暴安良,但奈何供書教學嗰個義父係黑社會高層。」

羅仲謙
羅仲謙指《無間道》中羅嘉良對佢供書教學,自小就培養佢做黑警。
羅仲謙
羅仲謙認為劇中嘅佢係一個悲劇人物多過奸角。

國內機會多

講到近兩年羅仲謙花多咗好多時間喺國內工作,喺香港嘅時間相對少咗,羅仲謙表示:「呢兩年係嘅,因為內地有機會,待遇亦都比較好,我就會嘗試,好似依家TVB有好多合拍劇去幫旗下嘅artist提高知名度,進入大陸市場,將來大家都會有機會拍好多合拍片或者大陸嘅製作,我只不過係早少少去嘗試呢一步。」問到羅仲謙對返國內拍戲有咩體會?佢話:「待遇好好!我返去拍劇,衣食住行都有專人照料,甚至去到山旮旯拍外景,佢都唔知點解可以變到間房出嚟畀你,有埋空調、梳化、床,喺山旮旯喎!所以待遇其實係好好。」

羅仲謙
羅仲謙近兩年花多咗好多時間喺國內拍戲,佢話喺內地工作待遇好好,衣食住行都有人照顧。
羅仲謙
羅仲謙話試過喺內地去到山旮旯拍外景,劇組都可以變到間房出嚟,入面有晒空調、梳化同床,可以畀佢好好休息。

TVB演員距離近

羅仲謙又感慨表示:「我自問好好彩,早幾年喺香港拍戲,由小角色開始,跟住到入TVB慢慢做,知道好多嘢唔係應份,亦都有捱過,有時我會同國內嘅演員分享我喺TVB嘅經歷,平時我哋嘅戲服係自己去攞,拍完要自己登記,因為驚第時連戲著錯衫,飯係要自己去攞,無論地位幾高嘅演員甚至幕後,都係一齊食飯,但大陸就唔同,係分開食,有好處有唔好處,可能有啲演員係需要拍完之後有好大嘅空間去休息,同樣可能令演員之間距離感遠咗,TVB有個優點,演員之間距離近、親切,係一種外面取代唔到嘅感情,所以返TVB拍係好玩嘅,尤其係我哋同輩嘅演員,大家都經歷過、做晒主角,返到去有另一種嘅體會。大家成長咗,再拍群戲,火花又唔同咗。」

羅仲謙
羅仲謙指以往喺TVB拍劇,戲服要自己去攞,拍完要自己登記,因為驚第時連戲著錯衫。
羅仲謙
但羅仲謙亦讚TVB有個優點,就係演員之間會一齊食飯,大家距離近,有親切感。