美國完成甜蜜婚禮 王君馨 :我係章太啦!

31歲的藝人 王君馨 與圈外男友Daniel昨日在美國紐約舉行婚禮,為人生大事忙足一日後,君馨在香港凌晨時間跟大家分享喜悅!相片中可見君馨着上中式傳統裙褂禮服,亦有換上雪白婚紗行禮,拍拖多年的戀人終拉埋天窗,在眾多嘉賓見證下深深一吻,真係好幸福!恭喜君馨同Daniel!

索爆姊妹團鍾嘉欣做大衿姐

君馨與Daniel在美國相識,所以選擇回到當地行禮,圈中好姊妹鍾嘉欣、李亞男、衛蘭及裕美等專程飛往參加,絕對係索爆姊妹團啊!早上一班姊妹幫佢着上裙褂,一對新人亦有跟足中國傳統,斟茶俾雙方父母。其中鍾嘉欣除了係君馨的伴娘外,仲做埋大衿姐!

姊妹團sweet爆送驚喜

之後去到婚禮場地,由衛蘭帶領唱詩歌,另外仲有裕美、李亞男等姊妹,君馨透露眾姊妹非常貼心地準備了一個長達10分鐘的分享環節,期間更唱出了一段rap歌送俾一對新人,歌詞非常之sweet,令兩人非常感動!

王君馨 :「我係章太啦!」

君馨又稱整個婚禮過程非常溫馨,唔少嘉賓事後都表示感動落淚,而一對新人當然當然既感動又開心。最後君馨再高呼自己榮升人妻:「拍拖11年11個月14日的日子已經過去,終於今日我係章太啦!」

7月11日香港補擺喜酒

在美國舉行婚禮後,君馨與Daniel將於下月11日在香港美國會補擺喜酒,到時會邀請更多親朋好友出席!

全文完