樂易玲

老公冇影 群星搶賀 古天樂激罕撐樂易玲

每年生日例必開P慶祝的樂易玲,今年更是她「登六」前最後一個生日,當然要隆重其事搞大佢,樂小姐選擇在正日前提早在大坑一間餐廳開P慶祝,上年由無綫助理總經理,殺埋入邵氏兄弟電影做揸弗人的她,在電視圈影壇都舉足輕重,當晚邵氏旗下藝人,一班無綫視帝視后小生花旦以至多年好友,統統到齊搶賀樂小姐,雖然老公冇現身,但連熱辣辣今屆香港電影金像獎影帝古天樂都激罕畀面到賀,樂小姐心情靚到滿場飛不停同人隊酒,古仔現身更成為群星集郵對象,場面失晒控,星光熠熠直頭媲美TVB台慶頒獎禮。

撰文:東方新地|圖片:新傳媒圖片庫、樂易玲IG

樂易玲開P 視帝視后到齊

無綫高層樂易玲每年生日例必開P慶祝,生日會可以話係一年一度電視圈盛事,今年將邵氏兄弟電影搞得有聲有色的她,公司搞作多多電影網劇陸續有嚟!59歲生日會就如同TVB台慶頒獎禮般場面墟冚,紅星好友爭住到場恭賀。當晚七時許,著住白色連身裙的樂易玲,由兩個兒子陪同到場,雖然近期同老公傳婚變,當晚亦未見老公現身,但仍無損樂小姐生日開P興奮心情。

樂易玲
壽星女樂易玲全晚開心滿場飛,期間亦有走出露台同賓客敬酒,眾人更爭住同樂小姐影相。

未幾,楊千嬅老公丁子高已經攞住支酒單拖到場搶賀樂小姐,之後吳岱融、劉偉強導演、黃浩然、朱晨麗、阮兆祥、陳百祥黃杏秀等亦陸續到達,約晚上九時,無綫兩大視帝王浩信同陳展鵬,以及視后田蕊妮、胡定欣、唐詩詠等亦先後到場出席畀面派對。

樂易玲
兩大視帝王浩信陳展鵬當晚一早到場賀壽,兩個視帝更左右夾實樂小姐影相。

古仔搞㷫個場

當晚就連生日會稀客影帝古天樂亦激罕到賀,場面星光熠熠。據在場人士透露:「古仔嘅新公司,嚟緊會同邵氏有好多合作,近排同樂小姐成日有接觸,雖然古仔呢排開緊戲,工作都好忙,但佢都專誠嚟賀樂小姐,影帝到嚟,大家真係好驚喜,古仔一出現立即搞㷫個場,個個爭住搵影帝集郵,佢全晚冇停過同人影相,大概逗留咗一個鐘,因為仲有工作,古仔同樂小姐舉杯之後就走先。」

準視后陳煒亦帶咗大紮鮮花到場賀樂小姐生日,近日演太平公主爆紅,行出街經常畀人集郵的煒哥,呢日一見古仔即變小粉絲,迅速搵影帝集郵 放上個人社交網,興奮心情不言而喻!

當開祝捷會

不過,場內愈夜愈精彩,一班嘉賓在場就不停狂隊酒,又不停同壽星女selfie玩到好high,當中《飛虎之潛行極戰》一班台前幕後差不多總動員到齊,話晒劇集在內地點擊高達30億,稍後又會開拍第二輯,眾人當正開祝捷會一樣興奮。當中張兆輝吳卓羲黃宗澤呢班飛虎男神,更經常走出露台吹水隊酒食雪茄,情緒高漲,之後該劇女主角Jeana(何佩瑜)、伍詠薇亦加入陣營,眾人愈傾愈high手舞足蹈。

樂易玲為慶祝59歲生日,特地提早兩日( 6月29日)在大坑一間餐廳開P,無綫一班上位小生花旦搶住到賀,已經冇續約無綫近期憑《飛虎》再度爆紅的吳卓羲,未到九點已經到場玩到凌晨,同張兆輝不時走出露台飲酒吹水。

據知情者透露:「《飛虎》可以話省靚咗邵氏兄弟嘅招牌,《飛虎》一班兄弟姊妹點會唔high吖!佢哋直頭好似開慶功宴咁,全晚飲唔停,啲酒開 完一支又一支!」

見吳卓羲張兆輝飲酒傾唔停,《飛虎》兩位女主角Jeana同伍詠薇亦先後走出露台,同班男神一齊對飲,Jeana更表現high到爆。

圍埋互劈

除咗《飛虎》到賀嘉賓玩到癲,近日熱播的《深宮計》一班女主角亦搶盡風頭,兩位公主陳煒、劉心悠和昭儀周秀娜,亦約埋嚟賀樂小姐,難得聚埋狂傾女人經,就連忙於綵排舞台劇的劇中皇后胡定欣,亦在十時多趕到,一班女人圍埋不停舉杯互劈,據知情者透露:「場內好多人都玩到好high,《深宮計》班女一樣唔輸蝕,呢排套劇播到如火如荼,好多人都走埋嚟讚佢哋做得好,又不停同兩個公主集郵,啱啱簽咗邵氏嘅心悠,仲同《深宮計》裡面嘅好姊妹娜姐(周秀娜)全晚黐到實,加埋太平公主煒哥,佢哋圍埋狂劈,估唔到佢哋咁飲得!」當晚歌影視三界別人士都到來賀壽,陣容是樂小姐近年生日會最盛大。

乖乖女劉心悠同《深宮計》好姊妹周秀娜全晚黐實互劈,飲到面都紅埋!
單拖到場的田蕊妮 (紅圈及下圖),期間亦有坐出露台食煙,不過她就大部分時間一個人玩手機,並未如其他人玩得咁放。

影帝畀面到

逗留約一小時的古仔,同經理人Ronnie一同離開,離開時碰到鄭明明,古仔仲同對方企街傾咗一陣。

一對對賀壽

袁偉豪同女友張寶兒拍住拖賀樂小姐,玩到晚上大約十點幾,兩人孖住離開,因為冇揸車,袁偉豪就同女友截的士返家。

近期同樣拍拖拍得高調的陳展鵬單文柔,亦孖住嚟孖住走。

馬明要開工,黃心穎單拖現身玩到約晚上十時許,黐住同男友鄧智偉刻意前後腳離開的高海寧一齊落樓,不過高Ling好快就上咗鄧智偉車,心穎只好自己走。

視后撐

樂易玲吹雞開生日P,上年啱啱做咗無綫視后的唐詩詠,就孖住同樣被力捧的李佳芯,玩到凌晨十二點幾先走。

忙於綵排舞台劇的胡定欣、三哥苗僑偉和阿叻秀姑,都有到場賀樂小姐生日。

樂易玲

樂易玲

當晚薜凱琪就同導演葉念琛等到場賀樂小姐。

樂易玲

歐陽震華攞住一袋禮物到場賀樂小姐,未入場玩已經好high。

單拖唔寂寞

有人一雙一對,但當晚王浩信就單拖到場,即使冇老婆陳自瑤陪住,王浩信一樣心情靚靚,不停過枱同黃智雯唐詩詠李佳芯飲酒傾偈,絕不寂寞!

樂易玲

一向是樂小姐愛將的黃宗澤,上年簽埋邵氏兄弟劇接劇未停過,梗要盛裝嚟賀伯樂生日,身邊未見緋聞女友陳嘉桓。

醉到扶住走

經常飲醉酒出事的李思捷,當晚亦飲到酩酊大醉,要由工作人員扶住走。