視后胡定欣首演舞台劇 飾陸小曼又唱又跳

最新娛聞

無綫重頭劇《宮心計2之深宮計》已經播映完畢,劇中女主角之一的胡定欣飾演的皇后王蓁奸到出汁!劇就播完喇,但係胡定欣同馬浚偉又有啲新搞作喎!原來兩屆視后胡定欣早前接受好友馬仔邀請,參演舞台劇《偶然.徐志摩》,喺6月29日至7月15日公演。劇中包含唱跳元素,今次仲係定欣首度挑戰舞台劇添!

撰文 :東方新地 | 圖片:Timable、TVB、網上截圖、胡定欣Instagram小馬工作室

胡定欣 《深宮計》肉搏馬浚偉

胡定欣之前喺《宮心計2深宮計》中擔正女一,飾演李隆基(馬浚偉飾) 髮妻王蓁,同李隆基愛妾鄭純熙 (周秀娜飾) 爭妍鬥麗,水火不容。之前喺劇中胡定欣不但同馬浚偉床上肉搏,仲一齊半裸出浴,大玩鴛鴦戲水!唔知佢地喺套舞台劇度又會擦出咩火花呢?

舞台劇《偶然‧徐志摩》由馬浚偉自監自編自導自演自唱,2016年於香港首演,2017年於內地巡演,今次喺香港重演就邀得胡定欣飾演陸小曼一角,更有姜大衛、馮素波、黃澤鋒、李龍基、林敬剛等好戲之人參與演出。

《偶然 徐志摩》以徐志摩先生短短34年的一生作為主題,揉合其著作、人生觀,以及與他生命中三位重要的女人 – 張幼儀、林徽因及陸小曼之緣聚緣散,結合水袖舞、華爾茲、中國昆曲、多媒體投影等表演藝術元素,喺舞台上重現呢位才子嘅浪漫才情。定欣在劇中扮演的陸小曼,既擅長舞蹈又會唱崑曲。因為定欣本身有中國舞基礎,不嬲都係跳得之人,馬浚偉仲因此特地為定欣加插了一場獨舞,俾佢發揮所長添!

定欣喺自己Instagram上傳練習照片,又真係跳得有板有眼,幾好咁喎!

定欣喺劇中嘅水䄂舞表演都有成兩分鐘㗎!她就話要獨自練習,感覺似孤軍作戰。不過馬仔就大讚定欣悟性高,很快已學會,對她的演出很有信心。

就算喺橫店忙著拍劇之餘,定欣都不敢怠慢,盡量利用拍劇餘暇,參考資料熟讀劇本,務求綵排時能更快進入角色,仲乘機宣傳添!

籌備舞台劇期間,定欣不時都有喺社交平台度更新排練嘅照片,睇得出佢對今次公演都非常上心!

定欣第一次出演舞台劇,佢班「胡說八道」姊妹團梗係齊齊出席支持佢啦!除咗「胡說八道」姊妹團,其他圈中好友都有俾面出席,支持定欣同馬仔~

嚟緊都仲有幾場騷,希望定欣馬仔都演出成功啦!

讀者留言