ft pic

自己買蛋糕慶祝 Sammi 44歲生日冇人陪

周五(19日)係鄭秀文44歲生日,日前Sammi晌ig上載咗一段短片,片中Sammi自己唱生日歌俾自己聽,仲話連生日蛋糕都係自己買!咁陰功豬,原來老公許志安要去馬來西亞雲頂開騷,分唔到身同老婆慶祝,但就事先張揚開騷期間會有驚喜送俾Sammi!有個咁浪漫嘅老公,正日冇人陪又有乜所謂喎!

延伸閱讀︰

反擊蘇施黃 麥明詩靚抽撐港隊

小鮮肉版馬神 馬德鐘18歲仔接棒入行

踏正12點,Sammi立即上ig祝自己生日快樂,兼多謝粉絲祝福。N年前AC米蘭球員岩布仙尼對住亞視個鏡頭唱「Happy Birthday to me」,俾人笑到依家,估唔到Sammi竟然要步佢後塵,唱生日歌俾自己聽!

咁都未算慘,原來連生日蛋糕都係Sammi自己俾錢買!慘上加慘係Sammi生日正日要開工拍MV,冇晒mood嘅佢惟有繼續拍下短片自娛,一時扮眼瞓,一時嘟嘴賣萌!

講到Sammi咁慘慘豬,其實都係一日半日啫!事關安仔去咗大馬開騷,完騷就會飛返香港陪Sammi補祝生日;而且安仔出名錫老婆,上年Sammi生日,本刊影到安仔送名牌朱古力俾Sammi做禮物,平時唔使開工又必定兩公婆孖住出動。有個廿四孝老公,日日都係生日啦!

全文完