LAM1

與麥明詩情已逝 林作:冇連體嬰過

麥明詩日前自爆將林作降呢為朋友後,林作今日終企出來接受本刊訪問,期間,林作不斷強調同麥明詩一直以來只係朋友關係,更反問:「幾時有同佢連體嬰過?」唔知麥明詩聽到呢番話,會有咩感受呢?

延伸閱讀:

喊爆講數 麥明詩上林作屋企執嘢走

同法籍新歡歐遊放暑假 陳法拉正式回歸美國開學

認只係朋友關係

新:新地 林:林作

新:依家同麥明詩關係點?
林:冇回應
新:冇回應?
林:我同佢溝通過,我哋決定係我唔會有任何關於我同佢嘅關係嘅回應,交俾佢嚟答!
新:但佢話依家同你降呢做朋友
林:一直都係朋友!如果你睇番咁來以嚟,我同佢從來都冇正面地講過我哋係咩情侶關係!其實係冇,佢回答係consistent,但無論如何,佢所有回答我都係採納!
新:但呢個共識幾時有?係咪嗰個新聞(降呢做朋友)出嚟就有?
林:其實我唔作回應一排,一早已有呢個共識,咁你問關係係點,我哋一直以來都係話係朋友,所以都係咁答!

新:佢唔開心講到喊喎?
林:你指佢喺呢度(新地Live fb)?我未睇過段片!

仍有同麥明詩聯絡

新:新聞出街後,你同佢有否聯絡?
林:我哋有聯絡,朋友有聯絡。
新:有冇問佢點解喊?
林:片我冇睇過,喊就好似有。
新:你清楚啲!
林:我冇同佢討論過,即使有,我不便評論!
新:佢叫你封口?
林:我覺得呢啲嘢交俾佢講比較好,同埋我唔想講啲咩影響到佢,但佢諗法同講法係完全正確!
新:係咪之前你攬女事件,令大家關係破裂?
林:幾時變咗攬女呀?絕對冇張相攬女,依家搵張相嚟攬女,一定冇!
新:朋友有好多種,依家同麥明詩係咩類型朋友?
林:我坦誠冇睇Louisa(麥明詩)係點答,但佢講法我完全認為啱,有幾好朋友就幾好,佢講。

新:有報道指你阿媽話你好慘!
林:阿媽嗰度真係要講,佢係一個愛亂噏嘢嘅人,信佢一成差唔多,所以唔使太理會佢!
新:你最近係咪唔開心,好多嘢諗?
林:我冇乜,心情唔錯,專心工作!

冇連體嬰過

新:你依家感情狀況呢?單身?拍拖?
林:但呢個回答我俾唔到!
新:自己感情都唔答得?
林:佢(麥明詩)幫我答埋啦,任何回答都牽連到佢,我唔想!
新:依家做Yes man?
林:我純粹唔想影響到佢,呢啲嘢交俾佢回答!
新:咁依家係咪佢有佢,你有你?
林:我從來都冇,我幾時有同佢連體嬰過?坦白唔想太多我哋兩個一齊啲新聞。
新:你唔想佢影響工作,所以轉地下情?
林:我答過我哋一直都係朋友,如你喺任何報道訪問中,見到我同佢直認對方係男女朋友關係,咁我俾個咩都得你!
新:咁你會否識其他女仔?

林:我生活方式一直冇變,我相信人生自由live your own life!

全文完