芒實陳展鵬 單文柔 向胡定欣示威

陳展鵬(煎pang) 和胡定欣的緋聞傳到似層層,煎pang多次公開大讚定欣完美,又做柴可夫車定欣開工,放工又車對方入西貢食糖水,仲孖住睇演唱會,莫講話外界認定是一對,連當事人都陶醉曖昧當中。點知突然殺出落選港姐 單文柔 ,被斷正同煎pang摸黑上山頂開餐。 單文柔 越級挑戰視后定欣、搶灘視帝煎pang成功,想戀情公告天下是常識吧﹗吼準早前全台藝人齊集力谷Big Big Channel大日子, 單文柔 當住胡定欣面前,同煎pang合體做直播訪問,高調放閃向胡定欣示威 ,真係睇見都眼火爆﹗

圖片來源:新傳媒資料庫、單文柔@IG、胡定欣@IG、Big Big Channel截圖

芒實陳展鵬 單文柔 向胡定欣示威

無綫筍盤所剩無幾,陳展鵬出名孝順、好戲兼錢途無限,最重要是未婚,自然多人吼,最後落在27歲落選港姐 單文柔 手上。處理感情事如活在上世紀年代的煎pang為保事業,打死唔認戀情,死撐山頂夜會是傾公事。 單文柔 表面配合將戀情低調,卻為鵬嫂名份頻頻發功,不但由本來跟煎pang夾口供以「了解中」形容二人關係,自行升呢「考慮中」,又自爆跟鵬媽有見面!

延伸閱讀:

擔正《男臣》做太監 何廣沛:我本身就似公公

環遊世界 蜜月造人 黃翠如 蕭正楠8月結婚

剛去完日本度假的胡定欣,出席無綫活動時,容光煥發,皮膚水潤剔透,單身一啲都唔dry。

 

 

早前陳展鵬同單文柔出席同一活動,極速鬆人被指冇風度,後來在另一活動碰頭,煎pang半推半就同女友合照,首張世紀合照先得以誕生。訪問時,單文柔突然自爆有見伯母,煎pang急兜:「公司大部分同事都見過我媽咪﹗」女方同男方對公開戀情態度明顯不同步。

IG貼旅行照 疑似預支蜜月

日前單文柔貼出在蜜月勝地泰國閣骨島,穿上三點式享受陽光與海灘,同期陳展鵬未有更新社交網、亦未有貼出工作照,被指揸相機是煎pang,好有機會齊齊出埠預支蜜月。

 

後台不離身

早前無綫大晒冷宣傳Big Big Channel,煎pang同單文柔當晚冇任何表演要同台,大合照都隔成五行,煎pang被安排喺後台等做訪問,單文柔大部分時間都跟實煎pang,不但合體做娛樂新聞台訪問,又孖住玩直播,個樣好冧,煎pang就好唔自然,最後仲被邀一齊做訪問。據知煎pang有次在公開活動閃咗去冇同單文柔影相被指冇風度,為免再被人話,依家出席公司大型活動,記者要求佢哋合照、訪問,煎pang都只好照做,但把口依然唔肯認拍拖。

可以同煎pang孖住做訪問,單文柔心情大靚,不時烏身露線大派福利。

 

 

節目上,陳展鵬在台上即場玩live,網友惡搞問女友單文柔去咗邊?不過煎pang詐睇唔到,始終唔肯公開戀情。

向定欣挑機高調分享閨房樂

男的為免被指冇風度,女的又黐到實,最後成就了世紀合體開live。陳展鵬和單文柔接受無綫娛樂獨家直播訪問時,同一時間原來定欣在後方做訪問。單文柔不但有問必答,更不時甜笑望實煎pang,期間煎pang一時忘形大講爛gag:「盧海鵬又係鵬,我又係叫鵬,要唔要盧海鵬試咪?everything all right。」氹得單文柔哈哈大笑,單文柔透露直播會整嘢食,主播隨即問煎pang試過對方手勢未,佢答非所問:「你啱啱考到牌,會唔會揸車出街?」然後笑指唔敢食,單文柔扁嘴話:「好唔畀面呀﹗」煎pang笑住話:「你(指女主播)揸車我可以出街,佢(指單文柔)煮嘢食我唔會開live。」忘形自爆閨房樂嘅煎pang,似乎自知忘我失言,突然一輪嘴話會用煎pan扑女主持個頭,企圖轉移話題,而單文柔笑得心花怒放,又一次挑機大成功。

 

 

 

煎pang同單文柔在鏡頭前打情罵俏,原來同時間右後方胡定欣也正在做訪問,冤家路窄,定欣瞄到立即閃開。

昔日曖昧男女 今日生疏零交流

被踩到上心口的胡定欣,成晚悶悶不樂,當全體藝人上台時,更被安排跟煎pang排排企,昔日好朋友好拍檔如陌路,一個望左一個望右,全程零交流,定欣呆企在台中央,煎pang未有照顧昔日好朋友,反而捉住另一邊的唐詩詠吹水,令定欣更無癮。由好朋友變回生疏同事,據知早前煎pang成日營造同定欣係曖昧男女,又同記者講拍《同盟》時會把握機會進一步了解,又主動車定欣返工放工,又約去睇鄭秀文演唱會,連班姊妹都等煎pang進一步行動,突然爆出原來佢同單文柔拍緊拖,班姊妹都戥定欣唔抵被人借過橋冚住單戀情。

去年雙雙奪得視帝視后,煎pang應傳媒要求一咀再咀定欣,定欣細心為煎pang抹去臉上唇膏印,眼神流露愛意。

 

 

唔止台前,台後都感情要好,撇甩劇組撐枱腳。

 

 

今時今日,二人關係今非昔比,本來發呆中的煎pang,驚見定欣行近,突然驚醒低頭玩電話,定欣企正旁邊,煎pang不但未有打招呼,繼續低頭扮專心看手機,不敢正視定欣。

 

 

煎pang一時捉住王浩信一時又捉住田蕊妮玩自拍同直播,唯獨未有行近胡定欣身邊。

定欣唔愁冇market

陳展鵬和胡定欣在《城寨英雄》演的拳佬、刁蘭角色,令二人名利雙收,日見夜見感情大升溫,煎pang曾公開大讚定欣是完美女神,成功營造熒幕情侶。可惜突然爆出真命天女單文柔,跌到一地眼鏡碎。但其實弗爆的定欣唔愁冇market,近日不但有傳小鮮肉施駿喆對佢勁嗒糖,即將又同班好姊妹到澳洲拍旅遊節目,笑言會到酒吧求艷遇。

施駿喆

 

 

定欣早前跟陳山聰、謝東閔遊船河,大晒弗爆身材,大派福利。

 

全文完