最佳男女配角feature

《萬千星輝頒獎典禮2018》梁烈唯、林淑敏榮獲最佳男、女配角

萬千星輝頒獎典禮2018》今晚(16/12)舉行, 為各藝員喺同事2018年嘅努力作總結,而最佳女配角和最佳男配角分別由「大小姐」林淑敏和梁烈唯奪得。

撰文:東方新地 | 圖片:東星

梁烈唯奪最佳男配角

39歲梁烈唯入行14年,今年憑台慶劇《是咁的,法官閣下》新晉律師趙金水一角最次奪得最佳男配角。

梁烈唯多謝TVB栽培自己14年,回憶好多年前嘅失意,想放棄嘅時候有好多同事支持佢。同時,唯唯都多謝老婆同女女:「I love you,無咗你喺我身邊支持我,提醒我,我唔會再有呢個機會企喺呢個台上面。」場面非常感人。

梁烈唯被爆執二攤演律師

《是咁的、法官閣下》首播反應唔錯,劇情貼地講出法律系出身嘅學生,一步步成為社會上嘅律師同大律師都可能只係表面風光,實際未必如普羅大眾所想咁高搵錢力同咁易做!

梁烈唯

梁烈唯

除咗劇情夠貼地,選角亦同樣有被網民大讚,以香港先生黎振燁為例,高大靚仔唔在講,而且仲勝在夠生面口,成功為觀眾帶嚟新鮮感!

除咗有新人演員黎振燁,劇中仲有大家都非常熟識嘅麥明詩(Louisa)。眾所周知,Louisa本身就讀法律系出身,所以搵番佢嚟扮演律師就話都冇咁啱,一樣咁配合。

42吋胸肌型男點解唔拍?

然而,梁烈唯扮古惑仔就睇得多,但扮演律師呢啲專業人士就未免好多觀眾都睇唔慣!而且,有網友更批評唯唯望落點睇都唔似個做律師嘅人,加上佢喺劇中性格輕佻,難免唯唯就用番一慣演古惑仔嘅套路嚟演出!

雖然如此,有傳聞指唯唯本身唔係呢個角色嘅第一人選,反而係呢位大隻型男魏焌皓主演先啱!魏焌皓之前就試過喺《使徒行者2》飾演警察,望落都幾正氣嫁!

可惜,之前有傳魏焌皓因行為不當,疑似鹹豬嘴TVB一名女星,所以4月已經被TVB解約。雖然未知唯唯後來頂上呢件事屬真屬假,但可以肯定嘅係大局已定,大家都係繼續煲劇啦!

魏焌皓本有望上位

魏焌皓於2009年加入第23期無綫訓練班,畢業後正式成為TVB藝人,有靚仔樣又大隻的魏焌皓喺9年間拍過唔少劇集,雖然多數都是小角色,直至12年的《On Call 36小時》中飾演馬國明的細佬「張一康」一角後,漸漸為人認識。之後佢喺《不懂撒嬌的女人》和《使徒行者2》亦有不俗演出。

《不懂撒嬌的女人》開始更為人認知。

《使徒行者2》中,魏焌皓扮演由忠變奸的黑警朱志彬,劇中更槍殺心愛的戀人麥明詩,形象因而更為入屋。

「大小姐」林淑敏奪最佳女配角

「愛回家之開心速遞」入面飾演潑辣大小姐嘅42歲林淑敏奪得最佳女配角獎項,上年呼聲最高,可惜未能奪獎已令網民大失所望,今年終於眾望所歸喇!

林淑敏回憶八年前患乳癌時嘅經歷,多謝珍姐畀機會佢繼續開工,同時亦多謝「愛回家」製作團隊寫咗一個咁好嘅角色畀佢!

林淑敏 活在當下

林淑敏在2010年患上乳癌,經歷過多次化療同手術切除腫瘤後,終抗癌成功,講到呢個病令佢脫胎換骨,林淑敏笑言:「其實係祝福嚟,好多人會覺得,病一定好慘、一定係唔好,但我有呢個困難面對過,我又覺得一路行落嚟,其實所有嘢對我嚟講都係祝福、成長,我嘅性格改變咗好多,以前係好憂慮,好似好識計劃咁,會計劃到六十歲、七十歲,但係今日嘅我,我會比較傾向活喺當下,我會顧好今日、明日,將來嘅事,船到橋頭就自然直㗎嘞。我少咗好多憂慮,我覺得我諗咁多,一來未必會發生,再講我都未必會有六十歲、七十歲,唔知㗎嘛!個人豁咗出去,輕鬆好多、開心好多,演戲其實都係內心嘅反射,當我放輕鬆咗,其實對我自己嘅演技係有一啲幫助。」

林淑敏
2010年不幸患上第二期乳癌,林淑敏在患癌初期隱瞞雙親,「經歷過上次,依家我學識出事會話畀屋企人知,大家一齊行、一齊成長。」

問到林淑敏當初係點發現患乳癌?佢話:「我自己摸到㗎!乳癌有好多係深藏喺裡面,去到有徵兆被發現可能已經處於好危險嘅階段,我都算係好好彩,我嘅腫瘤係生喺表皮下面,凸起咗,唔去理都唔得,去睇醫生,好快做咗個決定,做手術,因為係表皮下,唔需要做全乳切除,但就要剪皮,剪走感染嘅皮。」

林淑敏

確診後三日做手術

同樣成功抗癌嘅薛芷倫話佢冇喊過一次,淨係知道要全力以赴去戰勝癌病,問林淑敏當時嘅心態又係點?佢答:「我有喊㗎,我係人嚟,哈哈哈哈!我唔係話薛芷倫唔係人,我相信每個人嘅處理方法都唔同。嗰時我仲開緊工,要同當時套劇嘅監製講,因為無啦啦失場人哋都要知咩事,對住佢又喊咗一餐,對住男朋友又喊咗一餐。但好快就消化咗件事,因為確診後,醫生第二句就同我講:『你唔使死嘅,你只係需要接受一個好長嘅治療啫!』我知道自己唔使死,再唔開心落去,我都係要繼續生活。確診之後三日就做手術,快到都冇時間諗。」

林淑敏
林淑敏憶述:「當時我屋企人唔知我生cancer,去到打第三針,我媽咪返嚟香港,我冇辦法瞞至講,我好驚佢唔開心,但原來諗埋佢嗰份係好戇居,我媽咪知道後話:『哦,你講咁耐,你想講你生cancer呀!你一定要醫喎,阿邊個就係堅持唔打化療,走得好辛苦,你一定要打呀!』」

問林淑敏當時要做電療同化療?佢表示:「要!需要做化療,打標靶藥同電療。電療就一個月,化療就四針、三個月,標靶十八針,啱啱一年,成個療程差唔多年半。過程冇想像中咁痛苦,我所經歷嘅副作用唔多,化療會嘔、會爛口,喺我身上都冇發生過,甚至乎我有能力做運動,甚至標靶藥未打哂我已經返番工。」

林淑敏
講到飲食方面嘅改變,林淑敏話:「我淨係有兩樣嘢唔得,唔食過甜嘅嘢,控制一日攝取大概六粒糖。六粒糖來自水果、飯、五穀,甜品、精製過嘅嘢我唔食,油炸嘅嘢我唔食,烤過嘅皮、動物油脂我唔食。另外莓類、抗氧化嘅嘢我會食多啲,但試過抗氧化嘅嘢食太多,血小板過低,咁我咪又食番少啲。依家我每日食兩個拳頭份量嘅連皮水果。」

求婚似開會

林淑敏同老公陳中原(Tommy)拍拖十三年,喺2013年結婚,問佢哋中間有冇低潮?佢答:「病嗰段時間,我同佢講不如算啦,當時大家都後生、三十幾歲正常會諗結婚生仔,當時我有病未必可以行落去。嗰時我覺得,甩咗佢我仲舒服,可以返加拿大養病。但係佢唔係咁諗,佢話:『唔係個個拍拖都係結婚、生仔、抱孫,我哋互相扶持,有幾耐命得幾耐命。』佢唔識煮飯,但佢知道食得好對我好緊要,佢去學煮飯,我打化療期間,佢每晚都煮五餸一湯。怕污糟我會感染,一放工就洗衫、煮飯、掃地,我好似大爺咁攤喺度睇住佢做,佢就係一個咁好嘅人囉!」

林淑敏
提到丈夫的關愛照顧,林淑敏多次表示:「我好好彩遇到佢。」

林淑敏又指自己原本冇諗過要結婚:「做完晒療程,再抖咗幾個月,有一日佢同我講:『你其實有冇諗過結婚㗎?』我答:『老實講,冇喎!』跟住佢話:『有冇搞錯!咁幾時結?你講嘞!結唔結?你講!』咁都已經唔係求婚啦,哈哈哈,我話:『要結咪結囉,咁結囉!』就係咁嘞,大家好似開咗個會咁。」

林淑敏

老公拒冒險生B

講到林淑敏依家41歲,其實都趕得切生小朋友,但佢話:「唔得嘞,我有雌激素過高,要食荷爾蒙藥,原本係五年一個療程,上年食完五年,醫生同我講:『你諗唔諗住繼續食第二個療程?如果你要生小朋友,你就要快嘞,依家就要停藥嘞,半年之後你可以準備生小朋友。』但依家醫學上整個荷爾蒙療程一睇係睇十年,我諗唔掂,我就返去同我老公講,問佢繼續食藥定生小朋友好,我老公就話:『唔好生,女人大肚雌激素好高㗎,好危險,我唔想要一個我唔識嘅𡃁仔,而令到你有危險。』好感動佢幫我做咗呢個決定。」

林淑敏

林淑敏哂與許家傑沙灘合照

林淑敏同許家傑戲外都各有另一半,但唔少觀眾仍好希望二人可以在一起。近日,林淑敏就上載咗幾張相上個人社交網,見到佢同許家傑一齊去咗沙灘享受陽光與海灘。當大家都可能以為佢哋兩個「自私約」去玩嘅時候,實情其實係去咗拍劇。

身形弗爆嘅送水輝赤裸上身,一身健碩肌肉表露無遺。

林淑敏「自私影」留念

難得可以離開一下錄影廠進行拍攝,去到沙灘取景嘅大小姐就緊係即刻把握時間影番幾張靚相,今次就真係「自私影」啦!

雖然大小姐冇着泳裝騷body,但著住條花花裙,馬上變得青春有活力!好多網民仲留言讚大小姐愈嚟愈靚。

林淑敏許家傑有埋床上戲

大小姐同送水輝呢一對螢幕情侶形象入屋之餘,亦非常得一班觀眾歡心。尋晚個集就講到大小姐繼續幫襯送水輝嘅初戀套餐,仲要有埋床上戲!但大家唔好誤會,佢兩個其實係去傢俬店,扮演龍小蓮同輝Dee即將要同居而試床啫。

蕭正楠已娶黃翠如為妻

蕭正楠同曹永廉憑《兄弟大茶飯》奪「最受歡迎電視拍檔」,由黃翠如、洪永城頒獎。蕭正楠講得獎感受時,正式公開黃翠如為太太,令全場藝員同事超驚喜!

黃翠如親自頒獎

蕭正楠多謝太太令佢成為一個識點樣照顧人嘅男人,全場叫佢哋錫返啖先,二人都有求必應啊!

廣告時間蕭正楠攬住太太條腰,二人笑到見牙唔見眼

二人非常激動,其他同事都紛紛上前祝賀!