被封宇宙 G.E.M. 唱歌X叫 鄧紫棋真情剖白

歌手鄧紫棋( G.E.M. )雖然只有26歲,不過已經係樂壇中一個響噹噹的人物,早在2008年出道時已經備受關注,風頭一時無兩。雖然阿 G.E.M. 唔常留在香港,不過近日在《流行經典50年》大晒唱功,令大家重溫其好歌聲,又會在九月開紅館騷!但早年在內地爆紅後,阿 G.E.M. 就被指態度寸到上太空,與香港傳媒交惡;另外又被網民指佢唱腔單調,只係識「X叫」。阿G.E.M. 早前接受本刊訪問時,就一一剖白對於自己被稱作「宇宙G.E.M.」及被指「X叫」的感受!

G.E.M. 《流行經典》晒唱功

G.E.M.近日忙碌住為演唱會造勢, 前幾日喺深受歡迎的無綫節目《流行經典50年》大騷唱功,自彈自唱哥哥金曲〈有心人〉、成名作〈睡公主〉,又分別同胡鴻鈞、Mag林欣彤合唱〈誰知浪子心〉及〈A.I.N.Y〉。 阿G.E.M. 嘅歌唱實力一向不容置疑,唔少網民直言胡鴻鈞、Meg在旁完全被比下去,果然有功架!

 

 

被封「宇宙G.E.M.」

阿G.E.M. 成名後被封為「宇宙G.E.M.」,然後慢慢被網民指佢行為離地,態度寸到上太空,漸漸呢個名已經成為佢其中一個廣為人知的外號。問到佢被稱作「宇宙G.E.M.」的心情,佢就話自己其實冇特別唔開心,一開始有呢個稱呼,係因為佢做咗一間公司的代言人要上太空。而阿G.E.M.本來早在2015年就有機會上太空,不過由於太空船到現時仍在進行檢查,所以未有成事。

 

 

同時亦有唔少網民認為阿G.E.M.的唱腔單調,來來去都係嗌破喉嚨至聲嘶力竭,故被稱之為「X叫」!阿G.E.M.直言係唔太需要理會呢個講法:「我覺得都幾唔使理,我由細到大所鍾意嘅女歌手,都係咁唱歌嘅,所以我細細個就係咁樣唱歌,對我嚟講冇第二種唱歌方法,所以對我嚟講其實係一種幾自然嘅嘢。」

獨特衣着品味

講到阿G.E.M.最出位之事,當然唔少得衣着方面!阿G.E.M.的衣着品味可謂相當有個性,跟其他年紀相約的藝人截然不同,先有最經典的緊身皮褲look,之後的「尿片短褲」及「蟲蟲裙」都為網民帶來無限「驚」喜!咁其實阿G.E.M.着衫係完全依足形象指導還是有自己style呢?

 

 

 

 

G.E.M.就話以前細個完全唔諗衣着方面的問題,只係專心唱歌,其他事都係公司幫佢搞掂。不過隨年紀漸長、入行日子耐了就有所改變:「依家見到一啲我特別唔鍾意嘅我會講,特別鍾意嘅我都會講。我同我嘅團隊其實有好深嘅信任,有時有啲我未試過,即使我唔係好sure究竟我着得好唔好睇,我都會俾佢哋試嘅,如果試咗真係好唔鍾意,我會同佢哋講:『我真係好唔鍾意,唔該唔好有第二次。』」

9萬留言狂轟

阿G.E.M.在大眾前經常都笑臉迎人,感覺係個好樂觀好堅強的女仔,不過其實佢亦有好唔開心,自己喺屋企喊的時候!「其中一次我記得喊得最淒厲就係2015年4月,嗰陣係「我是歌手雙年顛峰會」,亦係我人生遇過最大嘅一次輿論事件(編按:疑堅持唱新歌,而被飛出節目),我仲記得嗰陣我微博係有18萬個留言,起碼有一半係鬧我!」

當時《我是歌手》系列節目導演洪濤發長文解釋事件,但可惜冇人理會,依然繼續抹黑繼續鬧。最後阿G.E.M.傷心地將微博delete咗一個星期,然後日日喺屋企不停喊。

姊妹情永在

講完啲唔太愉快的事,阿G.E.M.亦分享自己和何超蓮、李蘊兩位好姊妹的感情!阿G.E.M.表示三人識於微時,17、8歲時已經一齊玩,到依家李蘊有家庭、超蓮開始忙於工作,大家生活都完全改變後,更會份外珍惜:「會好珍惜大家一齊玩到癲晒,唔開心就喺屋企喊到癲,好開心就喺屋企笑到癲,即使依家幾忙,呢啲時候仍然會好掛住。大家一齊share呢一段時期嘅成長,就會好長遠,其實我同超蓮都鬧過無數次交。」

 

 

全文完