AU FI

見家長好事近 歐鎧淳明年退役等嫁

25歲泳壇美人魚歐鎧淳又True又Pure、靚女身材好,再加上係運動健將加分加到爆晒錶,近年唔止升格變女神,仲半隻腳踏入娛樂圈成為廣告代言搶手貨。講起就心傷,一年前歐鎧淳宣布名花有主,因為有共同語言撻著棒球運動員胡子彤,一年後更加發展神速,早排見埋家長入埋屋,據悉明年專心參加埋亞運後就會正式退役等嫁被胡子彤私有化!

撰文:東方新地

圖片:新傳媒圖片庫、歐鎧淳Instagram

歐鎧淳 見家長好事近

歐鎧淳同男友胡子彤拍拖第二年過聖誕,感情進展神速,發展到賣甩全家人,剩番兩個人甜蜜蜜過二人世界。早前歐鎧淳接受訪問時表時明年4月開始參加選拔、再練水備戰亞運,到時有排忙,所以今個聖誕嗱嗱聲爭取相處機會:「佢屋企人聖誕去旅行,佢就畀人飛甩要留喺香港錄音拍嘢。我哋兩個會留港,聖誕節一 齊整DIY首飾,整禮 物開心過收禮物。」胡子彤父母雖然聖誕節不在港,不過其實一早見過歐鎧淳、一早認定對方係未來新抱。

歐鎧淳

拍拖笑唔停

拍拖一年感情穩定,早前歐鎧淳就應約出席男友家庭飯聚,歐鎧淳先約埋胡子彤去九龍城茶記消磨時間。撐枱腳期間,唔止鎧淳BB一個開心,坐喺對面的胡子彤同女友又講又笑話題不斷,感情好到一個點。

歐鎧淳
有情飲水飽咪就係呢啲,雖然要坐喺茶記等足成個鐘,歐鎧淳被男友氹得笑到忘形,淨飲都覺得甜。

歐鎧淳

歐鎧淳
歐鎧淳黐到實一實又深情望住男友,其實未結婚,女神已經一早被私有化。

母愛氾濫融入家中

之後再到觀塘會合胡子彤全家進行家庭飯聚,拍拖啱啱至夠一年,歐鎧淳已經同胡家上下關係熟絡又融洽,就連剛剛一歲的胡子彤姪女都好黐呢個未來嬸嬸,飯後眾人離場時,歐鎧淳更全程搶住抱B,同胡子彤夾手夾腳氹姪女開心,母愛氾濫似足一家三口。食完餐飯各自返歸,胡子彤拖到實送女友取車,歐鎧淳臨開車前,再與男友忘情吻別,好sweet!

歐鎧淳
終於等到男友家人,歐鎧淳急不乃待抱過胡子彤姪女,二人接力抱B,望落十足一家三口。
歐鎧淳
之後會合家人,胡子彤哥嫂放心交囡囡畀歐鎧淳抱住、父母亦都笑容滿瀉,一家人早當歐鎧淳係自己人。
歐鎧淳
食完餐飯各自返歸,胡子彤拖到實送女友取車,歐鎧淳臨開車前,再與男友忘情吻別。

認定胡子彤係結婚對象

雖然只得25歲,據悉歐鎧淳已經一早認定胡子彤係結婚對象,知情人士透露:「運動員思想單純又直腸直肚,佢哋兩個興趣愛好相同、一樣係運動員出身,所以拍拖之後絕對無三心兩意,一早話過想結婚。歐鎧淳好支持胡子彤拍戲做演員,胡子彤亦都支持女友專心備戰出年亞運。歐鎧淳都講過賽埋亞運就會認真考慮退役,好大機會退完役就正式開始籌備婚禮。」

胡子彤甚為愛錫歲幾的姪女,經常在社交網絡po上B女萌相。

襯到絕

美人魚歐鎧淳當然靚女有實力,形象亦都健康可愛成為影視同廣告界新寵,不過男友胡子彤其實都不相伯仲,型格外型加上健碩身型,《 點五步 》後演出機會不斷,繼港台劇及葉念琛套《心冤》後,最新作品係杜可風導演《 白色女孩》,同小田切讓、袁澧林做對手戲。

低調放閃

拍拖一年、感情好到已經談婚論嫁,不過歐鎧淳同胡子彤就好少上網晒恩愛,難得合照就係萬聖節齊齊扮迷你兵。

見唔到樣一樣可以「燦」爆眼,胡子彤早前po相假投訴女友踩污糟對新鞋,其實咪又係放閃。