ft pic

觀眾鬧爆結局太慘 《城寨》監製:未必三pair都冇好結果

《城寨英雄》結局愈來愈催淚,三對情侶命運悲慘,先有朝霞犧牲唔可以同牙佬結婚生仔;再有龍成虎俾楊竹鑾活生生打死,留低柯德莉孤伶伶;日前再有預告流出,暗示刁蘭攬住楊竹鑾跳樓,同歸於盡!究竟三pair人當中,係咪全部道有一個要死?《城寨》監製雖然唔肯劇透,但就露咗口風話未必三對情侶都冇好結果!咁刁蘭係咪仲有一線生機呢?

延伸閱讀:

拳佬牙佬刁蘭都有份 花曼半夜喊住寫遺書

《城寨英雄》朝霞慘死 觀眾哭崩

隨住朝霞慘死,唔少觀眾投訴點解結局要咁慘?點解好人死晒而爛賭發偏偏死唔去?點解係都要拆散三對情人?點解唔可以老規矩BBQ happy ending?一千個為甚麼,有人更起埋監製文偉鴻個底,話佢原來係悲劇主義者,之前幾套劇如《使徒行者》、《法網狙擊》等已經整死過唔少人!

朝霞慘死,然後到貓仔,觀眾喪鬧劇情太煽情,唔明點解要死咁多人!監製文偉鴻同本刊解釋,呢啲劇情安排全部都係有意思,唔係為死而死,「你哋睇到尾就會明白,有啲人嘅犧牲係有意義嘅!我希望帶出當年城寨根本就係一個龍蛇混雜嘅地方,要守護呢個地方就必定要有人犧牲,呢套始終唔係嘻嘻哈哈嘅喜劇,有人死係在所難免!劇本一開始已經係寫好咗君馨佢哋要死,中途冇改過。」

頭兩pair結局已定,最有機會大團圓結局嘅CP,只得刁蘭同拳佬呢對!日前流出預告暗示刁蘭會同楊竹鑾攬炒,但監製話最終結局未必係全部悲劇收場!其實早前曾經流出一張劇照,相中楊竹鑾被牙佬拳佬合力用「猛虎硬爬山」打死,莫非真係另有玄機?

全文完