許志安

51歲愈嚟愈fit 許志安 潮玩wake surf

都話兩公婆結婚愈耐、外型越似啦,好似Sammi鄭秀文同許志安呢一對,結婚五年,安仔都被Sammi感染,愛上做運動,愈嚟愈fit、愈嚟愈潮,仲愈玩愈青春㖭。

撰文:東方新地 │圖片:新傳媒圖片、許志安IG

許志安 潮玩wake surf

繼日前潮玩wake surf,曬完八舊腹肌,身體力行證明心境同身型都同樂壇班後生有得揮外,早兩日又見佢約咗友人在跑馬地食晚飯,大講大笑十足十後生細仔良朋相聚,cap帽短褲再襯對籃色波鞋造型亦都隨意得嚟好青春,喂,咁睇法,話安仔已經滿51歲,你信唔信先?

同朋友去跑馬地食西式簡餐,安仔好大方,食完嘢二話不說走去櫃枱負責買單。上個月啱啱生日51歲嘅安仔keep得fit,成身裝束又潮童一樣,邊似五字頭?

唔使驚,陪安仔撐枱腳都係男性朋友嚟啫,兩位好好吹,食完餐飯再傾多幾個字,臨別安仔都意猶未盡笑得開懷。

安仔話以前有演唱會先會狂操,平日做踢吓波,唔會太多操練,近年受Sammi影響,不會陪跑步,自己都keep住操肌,閒閒地都有六嚿腹肌同粗壯臂彎﹗

近來安仔愛上wake surf,無論晴天陰天都出海,難怪時刻保持年輕心態﹗