誓要爭贏王君馨 龔嘉欣 未攞獎先慶功

將於周日(18日)舉行嘅無綫台慶頒獎禮,除了視帝視后戰況激烈外,女配角亦爭崩頭!本來《城寨英雄》飾演「花曼」的王君馨被看高一線,但中途殺出《幕後玩家》飾演賢妻Carmen嘅 龔嘉欣 ,幾場崩潰喊戲看得觀眾痛心,被激讚演技有進步。日前嘉欣就與一班粉絲預先慶功兼補慶生日,仲送咗個DIY嘅女配角獎俾佢,看來各位對嘉欣攞獎嘅信心真係爆曬膨!

延伸閱讀︰

準備出嫁 香香甜蜜婚照曝光

《阿爺廚房》觀眾激讚 貼地鼎爺教傳統粵菜

《幕後玩家》晒演技

《幕後玩家》中黃宗澤出軌令嘉欣進入崩潰狀況,一場崩潰喊戲令大批網民對佢演技刮目相看;及後嘉欣另有一場喊戲亦演得淋漓盡致,令Carmen呢個角色深入民心!嘉欣更因此上位,被網民大力激讚,為佢在星期日的萬千星輝頒獎禮奪獎打下強心針!

預先慶功

雖然未正式攞獎,不過嘉欣班粉絲日前訂咗個蛋糕同自製咗一個女配角獎座送俾佢,眾人喺將軍澳一間咖啡店食tea預先慶功。龔嘉欣見到個獎真係堅開心,全程笑唔停。離開咖啡店後,嘉欣行到邊都有途人搵佢合照,又有人祝佢攞獎成功,連坐住輪椅嘅阿婆都話要起身同佢合照!龔嘉欣來者不拒極度親民,人氣嚟講真係冇得輸。

力爭破蛋

入行八年,嘉欣曾在頒獎禮被提名四次,但一直都是陪跑一族,但如今終成女配角及飛躍進步女藝員熱門!被問到係咪對攞女配角信心十足,嘉欣表示︰「都會想攞獎,我放咗好多心機喺工作上,八年嚟都未試過得到咁多認同。」嘉欣最後更笑言未攞獎唔會結婚,希望今次攞到女配角獎,可以做將來嘅嫁妝!

王君馨唔敢認大熱

另一邊廂,出道七年、現年30歲嘅王君馨(Grace)憑《城寨英雄》花曼一角,有份角逐「最佳女配角」。被評為龔嘉欣最強勁敵嘅君馨近日宣布婚訊,削弱攞獎成數,被問到對攞女配角有冇信心,佢話:「信心觀眾俾!(依家你係大熱!) 都係傳媒朋友俾,其實我睇個提名名單全部女配都好有份量,我唔覺得淨係我同嘉欣爭,有份提名都有份量有付出,所以大家都有機會,有嘅當然開心!」

王君馨又透露因趕拍劇未能到加拿大出席好姊妹岑麗香嘅婚禮,但香香話如果Grace攞到最佳女配角,會係最好嘅結婚禮物。

全文完