再做老竇 湊個好字!謝天華 晒B女相報喜
謝天華05年就同圈外女友李天恩(Tina)結婚,2014年Tina以42歲高齡懷孕生咗個仔謝浩飛(小天天),今年4月,天華就喺微博宣布太太再度懷孕,天天好快做哥哥!而早前Laughing喺宣傳新戲嘅時候,還透露太太第二胎陀女。今日謝天華就在其社交網貼B女照報喜,湊成個「好」字,恭喜晒呀!
謝天華 晒B女相報喜
51歲謝天華再做老竇喇!佢喺社交網晒出B女嘅相報喜,並留言:「Hello 我來了。先跟大家打個招呼!我叫 Mia 體重 2.88kg (6磅5安士)願各位哥哥姐姐 身體健康。 妹妹 MIA。 」
見謝天華抱實囡囡,父愛出晒嚟!
早前謝天華同陳小春、鄭伊健、錢嘉樂同林曉峰宣傳佢哋主演嘅新片《黃金兄弟》時,公佈BB性別:「係開心事嚟嘅!嚟緊屋企會再多個新成員,今次係粉紅色嘅!」即係囡囡,湊成個「好」字,囝囝天天好快就會多個妹妹喇,恭喜晒!