謝安琪老婆視覺下的老公 張繼聰：我好似個阿叔！
撰文：東方新地｜圖片：張繼聰Instagram
張繼聰謝安琪 去旅行
日前，張繼聰就同老婆喺白色情人節二人世界，去咗日本睇富士山。雖然暫未見一對可愛仔女，不過就見佢哋兩公婆又再次放閃，話說張繼聰除咗自己影靚景外，當然唔少得為老婆擔當私家攝影師，為謝安琪喺富士山下留倩影啦！
用老公視覺影自己女神老婆就緊係以最靚角度，相中嘅謝安琪自然而唔造作嘅pose就獲得唔少網民讚賞！不過，張繼聰就留言一段兩公婆嘅對話：「我：『依個位靚呀，企埋去幫你影張相吖』 ..兩秒影完，張相水準的確好高吓，佢：『真係ok喎☺️咁你埋去，我幫你影吖』..影完……我攞番手機一睇….佢：『點呀？ok嗎？』 我：『好好呀 ! 我好似一個阿叔第一次去旅行咁….』 …之後去其他景點，我冇再影相…..」，淨睇段對話都認真笑爆嘴！
老婆視覺下的老公
相信大家都好想睇下究竟喺老婆視覺下嘅張繼聰有幾大叔，有相為證，張繼聰亦上載自己老婆為佢影嘅作品，睇到張繼聰好生硬咁企定定，但成塊面就暗晒，成張相嘅感覺同謝安琪嘅獨照差好遠，唔怪得網民都不斷留言笑指：「係人問題，造型同pose既關係」、「唔係呀！你嗰張影得幾靚呀！影後邊座山」、「我笑咗出嚟」、「完全明白你心情」等等。
即時回顧：
張繼聰 街頭唱情歌冧謝安琪
張繼聰在Instagram上寫道：「老婆話唔要啲物質禮物，但係要難忘嘅冧豬嘅幾十年後都記得嘅，於是我帶佢去海旁，問班年輕人借咗啲架生……」原來佢問喺海旁嘅年輕人借咗支結他，即興自彈自唱張學友首《每天愛你多一些》冧老婆，片中所見現場有近百人圍觀，見證呢個浪漫時刻！
當鏡頭影到Kay時，佢笑得好燦爛好冧成副冧樣出晒嚟，相信呢份禮物最永恒，也令呢位幸福人妻一世難忘！
張繼聰仲話要多謝班借樂器畀佢嘅年輕人，更向Kay表白話要「每天愛你多一些」，兩公婆恩愛到暈。
原來獻唱前仲有段小插曲，張繼聰話喺海旁遇上周國賢夫婦，而周國賢除咗幫張繼聰拍片，都有份拎起結他獻唱佢首《目黑》！
張繼聰冧完今世情人，再發咗張同前世情人嘅相，佢上載咗張咀嘴囡囡溫馨照祝大家情人節快樂，仲搞笑話張相係「激嬲老婆系列」！
大家一齊睇片，感受吓當時場面有幾冧！
結婚12周年！張繼聰送浪漫金句冧謝安琪
早前係張繼聰同謝安琪結婚12周年，二人選擇食餐飯，簡簡單單地慶祝。張繼聰上載一張由美國作家及新聞工作者Mignon McLaughlin 寫嘅金句「A successful marriage requires falling in love many times ,always with the same person.（一段成功嘅婚姻要不斷與同一個人墮入愛河」送俾老婆，真係超級浪漫！
除咗金句，張繼聰亦送上2隻刻有名嘅杯俾老婆，，物輕情意重，簡簡單單嘅禮物卻有意義！
睇番當年張繼聰、謝安琪12年前嘅結婚相，阿Kay個樣都冇乜點變，保養得好好，阿聰明顯變得又man又成熟！
早前農曆新年，阿聰喺IG話最快樂係成日陪住一對仔女。見佢上載咗條短片，囡囡張靖好有愛咁錫咗哥哥一啖，張瞻都好開心！
張繼聰一家Chok住影相 仔女搶晒鏡！
兩個小朋友唔經唔覺已經大個咗好多，11歲嘅張瞻已經學識打扮，仲高到去媽媽嘅膊頭！兩兄妹仲學識擺甫士，哥哥識Chok樣，而妹妹張靖兩隻手篤住臉仔扮可愛，張繼聰同謝安琪都冇佢哋咁搶鏡！阿聰仲留言話「#哥哥曉擺甫#妹妹識插袋」。
不少網民都大讚「妹妹真係好得意」、「哥哥賣型！妹妹賣萌」、「全家型到一個點！依家連妹妹都識擺post」
已經11歲嘅哥哥真係長大咗好多！
一家四口着靚靚散步 張繼聰做龍友影家庭照
黃昏時分，張繼聰同太太謝安琪，囝囝張瞻，仲有囡囡張靖，一家四口趁晚飯前喺自住屋苑散步。一身白色衫，明顯有襯過啦！
由爸爸負責揸機，將兩個一生最愛嘅女人，影得特別靚！
阿仔喺爸爸嘅鏡頭下，忽然多咗幾分90年代嘅偶像特質！
可惜少咗一張全家福！呢張唔知係媽咪揸機定係阿仔揸機呢？
張繼聰 謝安琪 開自家花燈會
係人都知，張繼聰同謝安琪住喺大埔豪宅比華利山，間house對住個無敵海景，上星期中秋節佢哋一家人就喺屋企食飯聚天倫！
晚飯期間，仲有妹妹表演魔術助興！
食完飯，就將自己個天台，變咗做花燈會喇！排滿風琴式紙燈籠，好靚呀！
天色都算唔錯，夜晚又有點涼意，最適合就係賞月啦！睇吓阿Kay同個女一齊賞月，幾enjoy！
玩完賞月又玩錫錫，好溫馨呀！
大時大節，11歲嘅哥哥張膽，就一個咁坐咗喺天台望月，型到呢！
型到媽咪都要學吓！
大時大節，「晒囡狂魔」又點會唔把握機會晒吓！
