1

譚詠麟、阿叻去法國 玩「高級版男人的浪漫」

年年25歲唔係得把口,阿倫譚詠麟今年繼續有氣有力玩得又食得,三月中就拉大隊同成班年紀相若嘅朋友,包括叻哥及秀姑去咗法國,之後仲同性好友一齊飲住香檳歎番個雪地jacuzzi,仲貪玩將香檳互淋,真係勁疏干,呢啲咪叫高級版男人的浪漫囉!

撰文:東方新地|圖片:譚詠麟FB

譚詠麟 大玩高級版男人的浪漫

平民呢就成班麻甩佬齊齊食豆腐火腩飯,譚校長呢啲級數呢就高級好多倍。一年閒閒哋出埠歎幾次世界、次次都係嗰幾個朋友嗰個班底,講緊阿倫譚詠麟,一年一度又約埋叻哥同成班friend去咗法國旅行滑雪。

譚詠麟
阿倫譚詠麟今年繼續有氣有力玩得又食得!

早兩年好多人話叻哥個旅遊節目《叻哥遊世界》太離地,老老實實,辛苦咗大半世,歎吓世界有幾出奇?連日以來睇住阿倫晒相,不停食好嘢,呢頭食巨型海鮮拼盤,轉頭成班男人喺雪地浸住jacuzzi歎香檳,真實世界仲離地過拍旅遊節目!

校長年年25歲、個仔劍橋畢業、身邊永遠有一班志同道合老死一齊踢波、夾band、旅行歎世界,你睇!人地麻甩佬圍埋一齊食豆腐火腩飯,譚校長呢啲級數就食仲大過洗面盤海鮮拼盤,真係住得豪、食得更豪。小編67歲時可以似得阿倫咁自在,真係無得頂囉!

一行人豪遊豪食完巴黎,再上雪山包咗間小木屋滑幾日雪。