進軍飲食界 唐詩詠 王浩信 一拍即合開cafe

唐詩詠 同王浩信因合作劇集《不懂撒嬌的女人》飾演Cherry同Saving哥,劇中一段未能開花結果嘅感情睇到大家眼濕濕,好在兩人喺現實中擦出火花!不過大家咪諗錯隔籬,佢哋嘅感情只係建基於做生意上,兩人由劇集情侶檔轉做生意拍檔,每人投資6位數字開cafe,實行有錢齊齊搵。

Photo:新傳媒資料庫、無綫電視截圖

唐詩詠王浩信合作開cafe搵真銀

唐詩詠 同王浩信因合作劇集《不懂撒嬌的女人》而成為觀眾心目中嘅熒幕情侶,二人戲外唔止成為好友,更成為生意拍檔,二人近日每人投資6位數字開cafe,孖住進軍飲食業。

延伸閱讀:

藐同性做咪霸 劉佩玥 麥明詩直播開火

芒實陳展鵬 單文柔向胡定欣示威

Saving同Cherry喺觀眾心目中係熒幕情侶,原來佢哋私下唔止係好友,更係生意上的好拍檔。

 

 

 

王浩信:望三個月內開張

王浩信對此直認不諱:「係睇中咗舖位,但就未講得住,因為牽涉其他股東利益。」正如詩詠之前所講,有望喺呢三個月內開得成!一直同朋友搞緊時裝生意嘅王浩信,話 開cafe 係想將休閒時尚嘅概念帶到去飲食,被問到cafe會起咩名?王浩信笑謂:「Popcorn Cafe之類。」

 

 

大讚詩詠數口精

本身已經營潮牌服裝生意嘅王浩信,再度出擊進軍飲食界,佢充滿信心話:「唔踏出第一步,就永遠唔知道結果!」而對於詩詠呢位生意拍檔,佢亦好有信心,仲大讚對方數口精:「同佢合作時叫飯,發現佢畀錢好有條理,應該交畀佢管數。」

cake shop冇堂食,唐詩詠惟有揀幾款蛋糕匿入廚房食,趁機向店員偷師。

 

 

唐詩詠 約林子宣開餐

早前詩詠單拖去銅鑼灣幫襯一間cake shop,見佢同店員有傾有講,明顯係熟客仔,之後仲一次過揀咗幾款蛋糕匿入廚房試食,邊食邊同店員吹水,乘機偷師。歎完cake,去咗中環會合林子萱再食拉麵,認真擦得!詩詠咁鍾意食,唔怪得要開cafe啦!

收集完情報後,詩詠去咗中環會合好友林子萱再食拉麵。

 

 

詩詠先揸車送打扮性感嘅林子萱返其中半山寓所,繼而再兜番去清水灣屋企休息。

全文完