邵子風

邵子風背同居3年蝦頭 啜爆肉肉女

15年被指硬撬好姊妹龍小菌牆腳,撻著經理人邵子風的蝦頭(楊詩敏),同男友同居三年經常孖住放閃,以為42歲蝦頭感情轉入直路,誰知其貌不揚的邵子風生性風流,經常背女友蝦頭撩女不特止,日前更被本刊斷正,同貌似蝦頭的A貨肉肉女,匿埋車廂視像互相挑逗,即使隔住個mon,邵子風都癡纏到嘟嘴啜爆肉肉女,明顯二人關係不尋常。可憐被蒙在鼓裡的蝦頭,睇相雖然知道大件事,仲要幫男友苦撐:「講嘢嘟嘴啫!我講嘢都嘟嘴啦!」但就承認近來同男友各有各忙,冇乜時間見面!三年感情看來要受到考驗了!

撰文:東方新地|圖片:新傳媒圖片庫

邵子風 嘟嘴索吻

13年憑《My盛Lady》扮嘢扮到出晒位的蝦頭,由舞台劇界殺入電視圈,在TVB工作長做長有,近日播出的《翻生武林》有份演出外,早前就趕拍新劇《包青天再起風雲》,又要為舞台劇演出,難怪睇唔實唔定性的男友邵子風。

邵子風
邵子風單拖駕車到九龍城買火鍋配料,不過,買買吓嘢突然返上車廂,同一貌似女友蝦頭的肉肉女視像,傾傾吓邵子風仲冧爆嘟嘴向女方索吻,挑逗女方。
邵子風
邵子風在車廂開視像媾女,同女方隔住個mon都可以肉緊啜爆,果然係冧女高手。

雖然生得矮又其貌不揚,但恃住吹得幾嘴,邵子風即使有正印女友蝦頭,仍經常口花花撩女仔。日前,就被本刊斷正同貌似蝦頭的肉肉女視像。當日傍晚時分,邵子風一個人揸車出動,去九龍城街市買火鍋材料,見他買餸期間亦忙於睇手機,還以為他同女友蝦頭聯絡,誰知急急腳返上車廂的邵子風,開埋視像媾女對話,睇真啲,原來視像對象,並唔係女友蝦頭,是皮膚白滑的年輕肉肉女,見佢陶醉到不停嘟晒嘴向女方索吻,互相挑逗了差不多十分鐘。同一時間,蝦頭當時跟翟威廉丶周志文等又彈又唱,直播「Happy Live」當中。

邵子風
邵子風啜爆挑逗肉肉女,女方更被冧到一度閉上眼,同邵子風一齊嘟嘴,二人關係好不尋常。

邵子風

邵子風
蝦頭被問到男友邵子風啜女一事,睇相仍扮鎮定幫男友苦撐:「佢講嘢嘟嘴啫!我有時講嘢都嘟嘴啦!」

服侍周到

42歲蝦頭,15年被爆撻著經理人邵子風,二人極速在西貢同居,當時就有指蝦頭撬好姊妹,同是邵子風旗下的龍小菌牆腳,不過,即使邵子風曾同龍小菌拖手行街被斷正,當時邵仍否認同過小菌拍拖,只承認對方是好朋友同工作夥伴,蝦頭為撐男友閃爆認愛,又指同龍小菌是好朋友,最終龍小菌輸家離場。

邵子風
邵子風喺街市買餸仲掛住傳短訊冧女,似乎當時已經同肉肉女短訊緊。之後索性上車開視像談情。
邵子風
視像啜爆之後,邵子風即急急腳趕去買火鍋配料,連去幾個檔買齊配料,即駕車趕下場。

邵子風

據知情者透露:「雖然蝦頭唔算靚女,但佢勝在夠溫柔體貼又細心,好識得冧仔,佢唔介意做埋阿四對男友服侍周到,廚藝仲好了得,所以咁多年嚟,佢身邊都未試過冇仔,不過佢對阿Dean(邵子風)嘅感情係好投入,拍拖之後,佢其實對結婚都有憧憬,仲好努力減肥,除咗係想變靚啲氹男友,其實都注重咗飲食健康,話晒都過咗四十歲,希望搞番好身體為將來結婚做準備。」

邵子風
蝦頭15年被爆撻著經理人邵子風,當時更有指她撬好姊妹龍小菌牆腳,以前經常在lG晒合照的蝦頭龍小菌,自此亦感情不再。
邵子風
去年12月生日,蝦頭要在工作中度過,不過邵子風就扮情深好男友,專登攞埋蛋糕去探班,冧到女友開心po相上社交網放閃。
蝦頭 邵子風
扮嘢扮到出神入化的蝦頭,新劇《翻生武林》中扮《神鵰俠侶》的小龍女。

躁鬱症拖婚

可惜,明知女友已屆42歲高齡的邵子風仍未肯定落嚟畀名份蝦頭,之前被問到幾時娶女友過門,更以有躁鬱症做藉口,話「唔知自己擺得幾耐!」一味拖婚。

蝦頭 邵子風
上周三(3月14日)蝦頭在葵涌大會堂為舞台劇綵排,至傍晚6時多,同大班演員到附近茶餐廳醫肚。
蝦頭 邵子風
蝦頭長期劇接劇,早前趕拍新劇《包青天再起風雲》,另一邊又要為舞台劇綵排, 難怪忙到連男友邵子風背住自己做乜都唔知。

其實在今次斷正啜女前,邵子風已多次被拍到單拖約女,同前度龍小菌亦經常以工作為由唔避忌單獨約會,每次邵子風都氹得女方好開心。據知情者透露:「我哋都知阿Dean同小菌一齊過,不過嗰時小菌事業啱啱起步,佢哋拍得好低調,後尾蝦頭簽咗畀Dean,兩個仲情侶檔演出好快就撻著咗,嗰時小菌知道但好似畀人灌迷湯一樣。阿Dean好識冧女,亦從來冇放棄過個森林,畀佢睇中嘅女仔都係唔好彩啦!」

蝦頭 邵子風
蝦頭同邵子風經常情侶檔做舞台劇,為氹男友,蝦頭前年就刻意節食兼做運動減肥,成功在三個月內減走35磅肉,由肥妹變索女,用心良苦!

邵子風