郭子豪

《三個女人》爆肌郭子豪 完美男神Package

逢星期日有得睇的劇集《三個女人一個「因」》中,黃智雯一人分飾三角,演出多重人格角色,演技自然流暢,備受觀眾讚賞。而飾演唐米尼(Dominic)的郭子豪,就經常喺劇集入面騷肌,令各位女觀眾們睇到嘩嘩聲,實在成為劇集另一焦點所在。話說郭子豪除咗靚仔大隻、畢業於世界知名學府外,仲係來自富貴家庭!不容忽視!

撰文:東方新地|圖片:TVB截圖、Instagram

《三個女人》爆肌郭子豪

郭子豪於《三個女人一個「因」》中第九集出場,飾演唐米尼(Dominic),其中講述佢與黃智雯的其中一個人格角色菠蘿椰奶發生一夜情,並於拉斯維加斯結婚,及後來港但生意失敗,被業主趕走之後投靠菠蘿椰奶,並暫住在其家中。

郭子豪於《三個女人一個「因」》中第九集出場。
郭子豪於《三個女人一個「因」》中第九集出場。

郭子豪愈睇愈有「肌」?!

初時出場的郭子豪明顯衣著比較密實,但之後愈睇愈有「肌」,去到第二次再次出場就已經半裸登場。嘩,結實的胸肌、粗壯的手臂,六舊腹肌兼遮啲唔遮啲的人魚線,睇到人眼定定,差啲連心臟都停埋!

郭子豪在劇中攞正牌騷肌,作為劇迷嘅觀眾朋友們真係大飽眼福,完全係眼球嘅一大享受。

唐米尼(郭子豪飾)表示係方以因大律師(黃智雯飾)的老公。

郭子豪 - 《親親我好媽》籃球王子

如果有睇開無綫劇,或者就會留意到郭子豪亦有份參與去年熱播的《親親我好媽》。佢飾演的連國佳,都吸引到唔少女粉絲!劇中佢有「籃球王子」之稱,係何廣沛的死對頭,仲向年紀比自己大好多的訓導主任陳敏之示愛!角色性格都幾突出。

名牌大學高材生

郭子豪14年加入娛樂圈,讀完藝人訓練班後,簽約成為無綫「親生仔」。原來佢亦係圈中高學歷一族,中小學就讀於名校喇沙,成績一直名列前茅,據知未放榜已經有數間英國學校向佢招手。之後郭子豪畢業於世界知名學府倫敦帝國學院 (Imperial College London),佢修讀的機械工程學科更是排全球第3,名副其實係高材生!

A&F首位亞洲代言人

郭子豪21歲回港在保時捷做實習生時,憑俊朗外表及健碩身型打低二百幾位對手,被美國時裝品牌A&F選為香港代表,為該品牌百多年來首次選用的華人面孔!郭子豪不旦擔任A&F的2013春夏廣告男模,亦是該品牌世界巡迴宣傳的模特兒之一,曾在不同城市如芝加哥、倫敦、紐約等地出席開幕儀式。

想當年A&F中環旗艦店開幕,一眾半裸猛男強勢列陣,全城女士為之瘋狂!女士們如果睇番當年啲相,可能會發現自己同郭子豪影過相?

郭子豪本來已經好大隻,最近更加密密加操,一身肌肉超誇張!

住豪宅 揸靚車

靚仔、大隻仲係高材生,呢個package都仲未夠!因為郭子豪更來自一個富貴家庭!郭子豪父親開廠做製衣起家,現經營時裝貿易生意,身家不容小覷。父母住在大埔康樂園,而郭子豪就大個仔要有自己空間,以月租約三萬五租附近半山的獨立屋龍城堡,豪到爆!閒時唔使開工,郭子豪就揸佢部價值80萬的Audi座駕,去到家人住的康樂園會所做Gym。

郭子豪
大埔龍城堡

唔想「成功靠父幹」

雖然屋企咁富貴,不過郭子豪一直甚少提及家庭背景,保持低調。熱愛幕前幕後工作的郭子豪,讀書時期已經喜歡攞住DV四圍拍,曾專程報讀演藝學院的導演課程。之後佢開設製作公司,幫過馮允謙拍微電影,講到明唔想「成功靠父幹」!