鄭嘉穎

甜蜜返港 拖手晒婚戒 鄭嘉穎陳凱琳恨生「豬仔」

48歲嘅鄭嘉穎同27歲嘅陳凱琳,星期日(12日)喺印尼峇里結婚,昨晚鄭生、鄭太終於都返港喇!二人受訪時全程十指緊扣,笑容滿瀉,Grace更不時用冧爆嘅眼神望住老公,sweet到漏!

 

撰文:東方新地 圖片:新傳媒圖片

鄭嘉穎 陳凱琳 甜蜜晒婚戒

二人近凌晨12時步出入境大堂,二人應傳媒要求甜蜜拖手兼騷戒指,陳凱琳一現身,傳媒就叫佢鄭太,佢話好唔習慣:「空姐拎嘢飲嚟,佢話恭喜晒鄭太,原來佢叫緊我哋,嗰種感覺好得意!」在旁嘅嘉穎話慢慢就慣。

連日在峇里二人都係周圍食美食,過得好開心,講到日前係鄭嘉穎生日,問到太太送什麼禮物,鄭嘉穎話唔需要surprise,最好嘅禮物就係娶咗陳凱琳。問到係咪雙喜臨門?佢答:「有好消息先講啦!都未有消息,慢慢都唔遲。」問會唔會想追豬生BB?佢諗咗陣就答:「豬年都有排啦,都好嘅,豬仔係福氣。」

陳凱琳話奶奶冇俾壓力,有記者話陳凱琳爸爸媽媽都俾滿分女婿,佢話雙方父母今次婚禮都好開心。問喺禮婚上邊個眼淺啲?陳凱琳以冧樣望住嘉穎話:「差唔多啊!」嘉穎就答:「都唔係話眼唔眼淺,感動就會。」

接新娘時嘉穎唱出佢首《一千個願意》,問呢首歌有冇乜嘢特別意義?嘉穎話:「即係咁嘅,我呢,我就會喺屋企練下歌嘅,呢隻都係練歌嘅其中一隻嚟嘅,因為係小弟剛剛出道嘅時候嘅歌。佢聽過,話好鍾意呢隻歌,我話:『你好鍾意呢隻歌?』佢話:『歌詞係咪講我0架?』咁好明顯係講你啦!」Grace聽到忍唔住大笑,嘉穎續說:「佢話好鍾意聽,好想聽我唱呢隻歌俾佢,咁我就……佢話:『你要唱歌,我要聽嗰隻。』咁我已經知佢想聽邊隻。係啦!接新娘嗰陣就唱咗呢隻先至娶到老婆啦!」

講到接新娘過程,鄭嘉穎笑話:「哦,嗰啲姊妹同伴娘都好幫手,因為我真係冇乜人幫手,我嗰啲(兄弟)就掛住拍片嘅,亦都唔多出聲,靠我一個人去……好似搞掂晒咁,所以佢哋都冇乜點難為我。」一直情深望住老公嘅Grace大讚:「好叻呀你!」

擁抱代替錫錫

有記者叫鄭嘉穎錫啖Grace,但二人好怕醜,只係輕輕擁抱咗一下。

最後鄭嘉穎感謝傳媒朋友連日辛苦採訪,他說:「打搞咗你哋,真係唔好意思。」之後兩人沿途行去停車場仍然受到大批傳媒追訪,嘉穎一直攬實太太,二人仲舉V字手勢,之後登上七人車離開。

問到會否在港補擺酒,鄭嘉穎話唔會:「我哋心目中想要一個簡單婚禮,亦都得到雙方屋企人同意,我覺得幾圓滿,係一個我哋夢想中嘅婚禮。」問到會唔會再去度蜜月,鄭嘉穎話:「會呀!(去邊?)梗係唔話你知啦!」