馬明

醉爆《降魔的》慶功宴 馬明唔敢睇心穎爆乳相

最新娛聞

廣告

無綫人氣劇《降魔的》早前在《萬千星輝頒獎禮2017》奪得「全球網民最喜愛劇集」獎,男主角馬國明(馬明)更奪得「我最喜愛男角色」獎,「石敢當」胡鴻鈞亦憑主題曲〈到此一遊〉獲得「最受歡迎劇集歌曲」獎。日前劇集一眾台前幕後人員齊聚舉行慶功宴,無視寒冷天氣只著短袖T恤嘅馬明飲到塊面紅卜卜,當一眾演員攞住黃心穎當晚「爆乳」出席《2018國際中華小姐競選》嘅手機相片畀馬明睇,馬明大嗌:「限奶令喎!」更怕醜到耳都紅埋!

撰文:東方新地

圖片:網上圖片

馬明 短T上陣

《降魔的》中一班演員包括馬國明、謝雪心、阮小儀、黃智雯、何遠東、胡鴻鈞、趙永洪及譚嘉儀等都有出席今次慶功宴,一齊打邊爐兼唱K,場面非常熱鬧。事後眾人都有將合照放上網開心share,馬明「阿媽」小儀笑指:「《降魔的》慰勞gathering宴,開心到呢!」胡鴻鈞亦表示:「開心的一個晚上!!#降魔的慶功之今次好齊人呀#大家在各自的崗位繼續加油加油」

睇心穎性感照 大嗌:「限奶令喎!」

喺慶功宴上馬明遭一眾演員圍攻,攞住手機上一張黃心穎當晚出席《2018國際中華小姐競選》嘅「爆乳」相畀馬明睇,馬明怕醜到耳仔都紅晒,仲用部手機遮住自己塊面,大叫:「限奶令喎!」網民都大讚sweet!

《降魔的》爆冷失「最佳劇集」 拍續集添變數?

無綫《萬千星輝頒獎典禮2017》中,深受觀眾歡迎的大熱劇集《降魔的》先後攞咗「全球網民最喜愛劇集」、「最受歡迎劇集歌曲」、以及馬國明憑此劇獲「我最喜愛男角色」,套劇嘅編審方佩清日前透露已有續集的初步構思,連劇名都有!不過《降魔的》爆冷失落「最佳劇集」嘅大奬,未知會否為開拍續集增添變數?!

早喺賽前﹐編審羅佩清呼籲大家投《降魔的》一票,咁就增加開拍續集的機會!而首個頒發的獎項是「全球網民最喜愛劇集」,受網民歡迎的《降魔的》先拔頭籌,主演的馬國明、黃智雯等人開心劇集得獎,上台領獎的監製方駿釗及編審羅佩清,多謝台前幕後工作人員,全部人仲一齊高叫「十字路口見」,呼應《降魔的》演員自拍的片花,並已想好的劇名《降魔的之十字路口》!

《降魔的》計劃拍續集

《降魔的》編審羅佩清喺facebook發千字文除了感謝劇迷支持,仲透露計劃拍續集,連劇名都諗好,叫《降魔的之十字路口》,真係好消息!早前《降魔的》劇集一眾演員「小馬」馬國明、「芷若」黃智雯、「龍貓」何遠東、「石敢當」胡鴻鈞、「莉莉」譚嘉儀、「展明」黃子恆、「佩玲」林凱恩、「晶晶」謝雪心及「有為」蔣志光齊齊現身拍片支持拍續集,各人相繼做出撻匙、校倒後鏡、扣安全帶、揸車等嘅動作。

而片中另一亮點就係黃智雯大跳勁舞,雖然便服上陣,但係有舞蹈底子嘅佢跳得非常誘惑同吸睛,最後「天然呆」馬國明就同其他演員扭身扭勢切入鏡頭!而片尾就傳來一句:「十字路口有落呀唔該!」同埋「收到!」睇完條片真係好期待呀!

有片睇:

「龍貓」何遠東之後又喺IG上載大合照同留言:「基於要多謝大家對《降魔的》嘅支持,我地(哋)又點可以唔做多少少嘢去報答大家呢?嗱,真係少少少少!又基於一篇千字文岀現,我地(哋)又點可以唔準備少少片花,去吸住大家個睛呢?嗱,條片真係會吸睛㗎!究竟有冇《降魔的之XXXX》,就睇大家啦!」

讀者留言