NG

重提老公偷食 伍姑娘:我唔啋佢

伍詠薇老公練海棠上月被爆偷食34D長髮女,更匿車廂密會兩粒鐘。事後伍姑娘親自出來為老公解畫,為老公執手尾兼代夫道歉,表現得體被封為「EQ女王」!
延伸閱讀︰

那些年必追的經典卡通片

好驚嚇!《一屋老友記》寶家齊講鬼

伍姑娘:我唔啋佢

最近,伍姑娘重提老公偷食長髮女事件,坦言唔開心:「唔知應該開心定唔開心好,邊個會鍾意呢種EQ同回應,但都多謝人哋讚我,我當日係反映記者問我,最真表現。」問到如何擊退小三,伍姑娘表示事後不但冇審問老公,連鬧都冇,費事啋佢:「梗係冇,一對同居情侶或夫妻之間,唾罵愛人係冇意思,問題係要拎嚟解決,唔係攞嚟再發生問題。沉默真係最大懲罰!鬧乜嘢啫,俾大家沉澱吓,沉澱完大家就要傾番偈,唔好理呢單嘢,繼續我哋生活。我認為感情鞏固,唔係因為一句說話就咁易碎,做任何事都要企家庭方向,我唔會鬧一個我愛嘅人。」

去旅行補鑊

事後伍姑娘跟老公練海棠最終和好如初,練海棠出錢請太太去海南島三亞度假修補關係增進感情,入住當地五星級酒店Sofitel嘅總統套房,面積有2千幾呎,仲有私家泳池,方便兩公婆鴛鴦戲水,大團圓結局!出錢之餘,練海棠連助手都做埋,成日揸機幫老婆影相拍片,仲出埋鏡介紹食物。從伍姑娘個風騷樣睇得出,應該好滿意老公表現啦!

自爆老公愛夜蒲

今年跟練海棠結婚17年,伍姑娘表示過往鬧交次數十隻手指數得晒,最勁嗰次係發生於新婚後幾年,回想當年婚後首次北上拍劇,伍姑娘笑言:「有一晚我打俾老公,佢出咗去玩,背後夾雜女仔聲,我拍嘢好辛苦,又分開咁耐,於是就爆鬧,我話『點解有個女仔咁嘈,阿之阿咗摩洛哥,你靜啲先打番俾我』,之後收線。」事後伍姑娘自覺語氣過重,就算老公夜蒲俾女圍,都唔應該咁大反應!不過,伍姑娘自認脾氣似天氣變幻無常:「我係難以觸摸,人大個咗,尤其30幾歲後變成熟。處理嘢會諗咗對方先,鬧係冇意思,我唔係要同呢個男人分手,不如諗個方法大家易落台,相處得快樂,咁同呢個男人耐啲。雖然冇嘢係一生一世,但希望細水長流。」有咁識諗嘅絕世好太太,練生真係要好好珍惜!

 

全文完