金像獎2023｜楊詩敏轉發「輸俾王菀之莫名其妙」限動 曾嘆自己配角命　

楊詩敏轉發「輸俾王菀之莫名其妙」限動釀公關災難

楊詩敏最近一個IG Story引起是非，有指金像獎後楊詩敏轉發了大量支持者的限時動態，惟有一位寫：「蝦頭輸俾王菀之（最莫名其妙）！」，網民見到狠評蝦頭楊詩敏扮大方、為人虛偽，有網民仲問：「即係佢間接承認同Repost條友講嘅嘢？佢今次得罪了好多人……」、「佢又唔係做得好過Ivana好多，搞到好似驚天黑幕好委屈咁！」

楊詩敏為金像獎谷到盡 中門大開Deep V震撼夾奶見人

47歲嘅楊詩敏（蝦頭）舊年改變諧星嘅戲路，喺《正義迴廊》搏到盡飾演麥沛東嘅家姐，成功獲得「最佳女配角」提名殺入金像獎，憑着精湛嘅演技甚至被坊間認為係大熱門。楊詩敏對於金像獎極為重視，琴晚仲索性中門大開，身穿Deep V黑色晚禮服，激蕩奶現身會場，成為全場嘅討論焦點，網民更加認為視覺效果非常震撼，皆因以往蝦頭好少性感見人，多數封得好密實，今次突然解開「束縛」，完全令人猜想不到！

楊詩敏不敵王菀之大熱變慘敗 喊晒口見傳媒　

楊思敏喺《正義迴廊》法庭上嘅喊戲簡直完全令觀眾意想不到，加上《正義迴廊》全城勁讚嘅口碑，楊思敏一直被視為最佳女配角嘅大熱門，隨着琴晚頒獎禮賽果揭曉，正當宣布「最佳女配角」花落誰家時，頒獎嘉賓竟然讀出「王菀之」嘅名字宣布佢得獎，網民都洗版式留言指感到嘩然，竟然唔係自己心頭好楊思敏獲獎，王菀之可能都覺得賽果有啲爆冷，當時佢嘅反應都好愕然。

頒獎禮過後，美亞娛樂替公司旗下兩套電影《正義迴廊》、《風再起時》舉辦慶祝派對，楊思敏喺派對上見到傳媒都喊晒口，話見到朋友慰問感到好窩心，有朋友向佢直言：「無論點都好，蝦頭你都係我心目中嘅最佳女配角！」講到呢個位時，楊思敏幾乎雙眼通紅抹住眼淚，甚至直言自己只係配角命，一直都只能夠做女主角身邊最好嘅朋友，網民見到呢個場面，都替蝦頭感到非常痛心。

楊詩敏舞台劇諧星出身 曾加入無綫不見起色　

楊詩敏早年演藝學院畢業後，一直集中舞台劇演出，曾經短暫任職小學戲劇文憑教師，但係2006年打後回復自由身。楊思敏曾經獲得詹瑞文垂青，同埋經常喺葉念琛執導嘅電影客串小角色，但係講到蝦頭早年嘅演出，最為人熟悉莫過於是舞台劇《潮性辦公室》嘅搞鬼演出，尤其係色誘送水男一幕嘅經典對白：「哥哥仔，你啲筆筆冇晒汁汁！」

隨後楊詩敏喺2014年加入無綫電視成為基本藝人，但依然得唔到主角嘅名銜，喺不同劇集雖然露面率頗高，但「配角命」依然！諷刺的是，蝦頭曾於節目《Sunday扮嘢王》扮演加大碼版王菀之！這樣的日子維持了數年，楊思敏終於在2021年電視劇《愛美麗狂想曲》播完後，把心一橫決定離巢，展開新生活接拍咗《正義迴廊》，一改以往只做諧星派膠嘅形象，化身喊得又演得嘅民選「最佳女配角」，開始為人所記。

演藝學院派演員金像獎幾乎全軍覆沒

演藝學院向來都係唔少好戲之人出身地，其實睇返今年金像獎入圍名單，有唔少提名人都係演藝學院出身，當然唔少得備受讚賞嘅楊思敏，但其實仲有佢哋：陳詠燊、蘇玉華、張繼聰 、楊偉倫、麥沛東、何爵天、黃秋生。然而除咗何爵天憑《正義迴廊》勇奪最佳新晉導演外，原來眾人一致全軍覆沒，就算多次奪影帝嘅大師兄黃秋生，就算憑《白日青春》拎金馬影帝後，今次都一樣無面畀，戰況非常慘烈！