《愛回家》鍾凱琪被負評轟炸發文大呻 網友以馬蹄露經歷打氣！

鍾凱琪被負評轟炸

近日，《愛》以「假如愛有天意」為題，講述池美麗想拆散心儀對象安仔及其女友Bonnie嘅關係，因此決定同安仔打賭，若然雙方分開一小時後再遇對方就證明有緣，就要同佢拍拖。

點知時限到之時美麗真係出現，但當二人喺貨櫃內爭論時，突然山泥傾瀉令美麗、安仔被困。正當安仔擔心無糧之際，美麗反而拎出自己僅有嘅蛋糕仔俾安仔食，結果令自己最後不支倒地，而令安仔深深被感動！

二人被救出送院後，安仔去探望美麗時，被女友Bonnie見到情急慰問美麗嘅安仔，結果令Bonnie回想之前一名同學對肥妹仔嘅愛，心中暗感安仔會轉投美麗懷抱！

不過，唔少網民及觀眾都紛紛表示接受唔到安仔會同美麗一齊，又指非常嘔心拒絕追看，甚至用粗口罵編劇，反響甚大！

鍾凱琪發文大呻

當大家不斷留言之際，當時人嘅鍾凱琪亦有留意民意，更於個人社交網出post留言坦言睇到各方嘅負評後感到唔開心，指：「冇諗過大家會有咁大迴響」、「我都算係平常人，正常人畀人話嘔心，點都會有失落。」、「個人嘅感覺真係唔好受」等。

網友以馬蹄露經歷打氣

鍾凱琪長文一出，隨即令唔少網民紛紛留言打氣，有網民就以馬蹄露當年於《真情》演May May嘅角色做例，指：「廿幾年前馬蹄露被人全城鬧爆，唔係因為個樣，而係演技太好，將May May的乞人憎性格同行為演活。」；亦有網民以《延禧攻略》嘅爾晴做例，叫鍾凱琪加油！

同時，亦有網民表示鍾凱琪於劇中表情動作皆到位，演得甚至比Bonnie更好，鼓勵美麗！

事實上，鍾凱琪於劇中飾演嘅「美麗」一向都係個名副其實嘅花癡角色，戲中不時就會幻想與同劇男角色有感情線發生，如秦博思（馬貫東飾）、朱凌凌（吳偉豪飾）等，幾乎次次皆引起觀眾關注劇情發展。

不過，今次劇集成功引來大眾迴響，相信都只係針對角色，而非演員，所以相信凱琪其實都可以唔使咁唔開心嘅！